¿NANLO xigony buñguieeu reʼ cabeʼ balaʼ lairy reʼ la? Jehová góoch láabu gonybu ndeʼ. Né láabu ngú Ahías profeta xtuny Dios. ¿Nanlo xí ngú toib profeta la? Láabu ngú toib buñ ni Dios raquiin par guiniʼ xí gac dzú ni sietra.

Reʼ Ahías cayooy diitz né Jeroboán. Jeroboán láabu toib buñguieeu ni bisaʼ yoʼ par Salomón. Órni Ahías radzaglóo Jeroboán ló néz, ronybu toib cós ni diti rony buñ. Rabébu lairy copy ni nócbu né rabébu láani doce laʼ. Raibybu Jeroboán: Cuaʼ chii laʼ lairy reʼ par looy. ¿Nanlo xigony raduidy Ahías chii laʼ lairy reʼ a Jeroboán la?

Ahías rabexa que Jehová cué galmandary ladxña Salomón. Ranibu que Dios guiduidy láabu chii family xiroʼ xtuny Jeroboán par gony mandarybu. Ndeʼ raduidy diitz que nosi chop family xiroʼ guiaʼan par gony mandary Rehoboam xiin Salomón.

Órni Salomón racadiag ni Ahías góoch a Jeroboán, radzuitzgolúbu. Rayopybu mod guigaitybu Jeroboán, per Jeroboán raxony riée Egipto. Radxiin dzú, Salomón raity. Láabu buny mandary cuarent íz, per nigoreʼ ma xiimbu Rehoboam noʼ xalagarybu. Jeroboán noʼbu Egipto órni racábu cuent ma goity Salomón, por ngú rabiguetbu Israel.

Rehoboam diti natzaay xcalrriembu par gony mandary. Nigolú nagudx góc xcalnabany Rehoboam, que bixiosbu Salomón. Jeroboán né stipnés buñxirop rieyibu né raibybu a Rehoboam que gac buñtzay né guirá buñ. Per diti racadiagbu. Más nagudx ronybu xcalnabanybu que antes. Por ngú, buñ rony que Jeroboán gony mandary chii family xiroʼ, per chop family xiroʼ xtuny Benjamín né Judá, Rehoboam rony mandary layibu.

Jeroboán dinaidy que xcudxbu tze Jerusalén gony adorar lainy yoʼ xiroʼ ro rac adorar Jehová. Por ngú rasaʼbu chop torien de or né ronybu que buñ de chii family xiroʼ guieen láamu. Diti xidzú racla gudx radzani de cós mal né ma diti goyoʼ galronladx.

Láaca goyoʼ galnagan lad gobierno xtuny chop family xiroʼ gudx Israel. Diti ma bisaʼ gáay íz de goló rasaló Rehoboam rony mandary, buñguieeu ni rony mandary Egipto rieed racaló Jerusalén. Racaʼbu xidal cós ni rasac ni noʼ lainy yoʼ xiroʼ ro rac adorar Jehová. Por tidxo dzú, yoʼ xiroʼ reʼ biaʼanni xomod dzú ni bisaʼyibu láani.