BENƐ matsɛ Yeroboam gbo se ɔ, matsɛ tsuaa matsɛ nɛ ye yiti je Israel wɛtso 10 nɔ ɔ, ji matsɛ yayami. Matsɛ Ahab ji matsɛ yayami nɛ pe mɛ tsuo. O le nɔ́ heje lo? Nɔ́ titli heje ji kaa, e yo nɛ ji Manyɛ Yezebel yi kpɛti wa.

Pi Israelno ji Yezebel. E ji Sidon matsɛ biyo. E jaa wɔ nɛ ji Baal, nɛ e ha Ahab kɛ Israelbi fuu hu ja Baal. Yezebel sume Yehowa nɛ e gbe E gbali fuu. Gbali ɔmɛ a kpɛti ni komɛ ya laa ngɛ tɛ puɔhi a mi konɛ Yezebel nɛ ko gbe mɛ. Be komɛ ke Yezebel ngɛ nɔ́ ko hlae ngɛ nɔ ko dɛ ɔ, e gbeɔ nɔ konɛ e nine nɛ su nɔ.

Ligbi ko ɔ, Matsɛ Ahab bua jɔɛ kulaa. Lɔɔ he ɔ, Yezebel bi lɛ ke: ‘Mɛni heje nɛ o be bua jɔmi mwɔnɛ ɔ?’

Ahab ha heto ke: ‘Nɔ́ nɛ Nabot de mi ɔ heje. I suɔ kaa ma he e wai ngmɔ ɔ. Se e de mi ke e be juae ha mi.’

Yezebel de lɛ ke: ‘Koo ye tsui. Ma ngɔ ngɛ e dɛ ha mo.’

Lɔɔ he ɔ, Yezebel ngma womi kɛ ya ha nimeli komɛ nɛ ngɛ Nabot ma a mi. E de mɛ ke: ‘Nyɛ hla yaka nimli komɛ nɛ a po Nabot nya kaa e gbiɛ Mawu kɛ matsɛ ɔ. Lɔɔ se ɔ, nyɛɛ ngɔ Nabot kɛ je ma a mi nɛ́ nyɛɛ fiaa lɛ tɛ nɛ e gbo.’

Benɛ Yezebel nu Nabot gbenɔ he ɔ, amlɔ nɔuu nɛ e de Ahab ke: ‘Jehanɛ ɔ, yaa nɛ o ya ngɔ e wai ngmɔ ɔ.’ Anɛ o kplɛɛ we nɔ kaa e sa nɛ a gbla Yezebel tue ngɛ yiwutso ní peepee nɛ ɔ he lo?

Pee se ɔ, Yehowa tsɔ Yehu nɛ́ e ya gbla Yezebel tue. Benɛ Yezebel nu kaa Yehu ma a, e ngɔ tsopa kɛ kpa e hɛngmɛ se, nɛ e dla e he konɛ e he nɛ pee fɛu. Se benɛ Yehu ba na Yezebel nɛ e hii si ngɛ saflɛ ɔ nya a, e de nyumu ɔmɛ ngɛ matsɛ we ɔ mi ke: ‘Nyɛɛ tsɛ̃ lɛ kɛ fia si!’ Nyumu ɔmɛ pee ja, kaa bɔnɛ o na ngɛ foni ɔ mi ɔ. A tsɛ̃ lɛ kɛ fia zugba nɛ e gbo. Manyɛ Yezebel yiwutsotsɛ ɔ nyagbe ji nɛ ɔ nɛ.