KƐ FAMIƐN Zeroboamu wuli’n, famiɛn’m be kwlaa nga be wa trannin nglo lɔ akpasua blu (10) be famiɛn bia’n su’n, be ti tɛ kpan. Be nun tɛtɛ’n kpafuɛ’n yɛle Famiɛn Akabu. ?Amun si like ti’n? I tɛ’n i dan kpa’n fin i yi’n, famiɛn bla klunwifuɛ’n Zezabɛli.

Nán Izraɛlifuɛ yɛle Zezabɛli. Sidɔn famiɛn’n i wa bla ɔ. Ɔ sɔ Baali, kpɛkun ɔ yoli maan Akabu nin Izraɛlifuɛ’m be nun sunman be sɔli amuɛn sɔ’n wie. Zezabɛli kpɔ Zoova ɔ maan ɔ kunnin i nuan ijɔfuɛ’m be nun sunman. Kɛ ɔ ko yo naan Zezabɛli w’a kunman be’n ti’n, wie’m be ko fiali yɛbuɛ buɛ nun. Sɛ Zezabɛli ɲin blo like kun wun’n, kannzɛ bɔɔ sran yɛ ɔ́ kún i naan w’a ɲan like sɔ’n, saan kɛ kunlɛ cɛ yɛ ɔ́ kún i ɔ.

Le kun Famiɛn Akabu klun’n timan jɔwa, yɛ Zezabɛli usɛli i kɛ: ‘?Ɔ yo sɛ ti yɛ ɔ ɲrun’n ti mlanwa sɔ ɔ?’

Akabu tɛli i su kɛ: ‘Min bualɛ mɔ Nabɔtu buali min’n i ti ɔ. Min waan ń tó i viɲi fie’n, i waan ɔ kplinman su.’

Zezabɛli seli i kɛ: ‘Nán ngalɛ’n ti ɔ. M bɔbɔ ḿ má fá mán wɔ.’

Yɛ Zezabɛli klɛli fluwa mun ko mannin klɔ nga Nabɔtu tran su’n, i su kpɛnngbɛn mun ɔn. Ɔ seli be fluwa nun kɛ: ‘Amun fa finfinfuɛ wie mun naan be tɔn Nabɔtu suɛn kɛ ɔ boli Ɲanmiɛn nin famiɛn’n be sannzan. Kpɛkun amun yi i klɔ nun fite naan be finfin i yɛbuɛ naan ɔ wu.’

Kɛ Zezabɛli tili kɛ Nabɔtu wuli’n, ɔ seli Akabu kɛ: ‘Kɔ ko fɛ i viɲi fie’n.’ ?Nán sran mɔ ɔ fata kɛ i ayeliɛ’n ti’n be bu i fɔ’n yɛle famiɛn bla sɔ’n?

Kɛ i blɛ’n juli’n, Zoova sunmannin Zei kɛ ɔ ko bu Zezabɛli fɔ. Kɛ Zezabɛli tili i kɛ Zei su ba’n, ɔ fali like jɛli i ɲin sin ndrɛ’n su klanman kpa, ɔ dili talua kpa. Sanngɛ kɛ Zei juli lɛ m’ɔ wunnin Zezabɛli fenɛtri’n nun’n, ɔ seli famiɛn i awlo nun sran nga be o i wun lɔ’n kɛ: ‘Amun to i yi asiɛ wun wa!’ Yɛ be yili i ase kɛ nga an fa wun i desɛn su lɛ’n sa ɔ. Be suli i bo yili i ase naan w’a wu. Kɛ Zezabɛli famiɛn bla klunwifuɛ’n, i liɛ’n wieli kɛ nga sa.