OMANO rire pe rréi Jeroboán, umi rréi ogovernáva guive umi 10 trívu oĩva nórtepe, iñaña. Pe rréi Acab ohasa enterovépe. Ndépa reikuaa mbaʼérepa? Peteĩ mbaʼe omoñañáva chupe haʼe pe hembireko Jezabel, pe rréina iñañaitéva.

Jezabel ndahaʼéi isrraelíta. Itúva haʼe pe rréi ogovernáva Sidónpe. Jezabel oadora Baálpe, peteĩ ñandejára guaʼu, ha ojapouka avei upéva Acab ha heta isrraelítape. Jezabel ndaijaʼéi Jehováre ha ojuka heta iprofétape. Oĩ proféta okañýva umi itakua rupi ani hag̃ua ojejuka. Jezabel oipotáramo peteĩ mbaʼe, oporojukánte oguereko hag̃ua pe oipotáva.

Peteĩ árape pe rréi Acab ndovyʼaieterei. Upémaramo Jezabel oporandu chupe: ‘Mbaʼére piko nderevyʼaireína ko árape?’.

‘Nabot heʼivaʼekuére chéve’, okontesta Acab. ‘Che ajoguase chugui iparralty. Péro haʼe heʼi ndaikatumoʼãiha omeʼẽ chéve.’

‘Ehaʼarõnte’, heʼi Jezabel. ‘Che akonsegíta ndéve.’

Upévare Jezabel oskrivi kárta umi mburuvichakuérape, oĩva pe siuda Nabot oikohápe. ‘Pehecha umi kuimbaʼe ndovaléiva mbaʼeverã teʼi Nabot omaldesihague Ñandejárape ha ñande rréipe’, heʼi. ‘Ha peguenohẽ pe siudágui pejapi itápe ha pejuka’.

Jezabel oikuaávo Nabot omanohague, heʼi Acábpe: ‘Koʼág̃a tereho ha ejagarra nembaʼerã iparralty’. Ajépa tekotevẽ ojekastiga Jezabélpe ko mbaʼe vaiete ojapóvare?

Upe rire Jehová omondo peteĩ kuimbaʼe hérava Jehú okastiga hag̃ua chupe. Oikuaávo Jezabel ouha Jehú, opinta hesa ha oñehaʼã oñemoporã. Péro og̃uahẽvo Jehú ha ohecha oĩha ventánape, heʼi umi kuimbaʼe palásiope oĩvape: ‘Peity upégui!’. Haʼekuéra ojapo upéva, rehechaháicha ko taʼangápe. Oity hikuái yvýpe, ha omano. Péicha omano Jezabel pe rréina iñañaitéva.