Isebel, ombara oserekaze omurunde
EHUNGI 66
Isebel, ombara oserekaze omurunde
KOMBUNDA yonḓiro yombara Jerobeam, ombara aihe ndja honaparera ouhona womihoko 10 vyokeyuva kokunene kwaIsrael ya ri ombi. Ombara Ahab ondja ri ombi tjinene pu avehe. Ove mo tjiwa kutja omena ratjike? Epu rimwe enene omena romukazendu we omurunde ombara oserekaze Isebel.
Isebel ka ri omukazendu Omuisrael. Eye wa ri omusuko wombara yaSidon. Eye ee rikotamene ku mukuru wovisenginina, Baal, nu wa tjita kutja Ahab nOvaisrael ovengi ve rikotamene ku Baal wina. Isebel wa tondere Jehova neye wa zepa ovaprofete vaJehova ovengi. Varwe aave sokuṱara motupoko kokutja ave ha zepewa. Indu Isebel tjaa vanga otjiṋa kangamwa, eye aa yenene okuzepa omundu kutja me tji mune.
Eyuva rimwe ombara Ahab ya ri aya yumana tjinene. Okutja Isebel we mu pura: ‘Omena ratjike ove ndino tji wa yumana nao?
Ahab we mu zira: ‘Omena romambo waNabot nga hungire ku ami. Ami mba vanga okuranda otjikunino tje tjomivite. Nungwari eye we ndji rurupara.’
Isebel wa tja: ‘O rikende, ami me kekukamburira otjikunino.’
Okutja Isebel wa tjanga otutuu kovarumendu ovahongore mba turire motjihuro mu mwa turire Nabot na tja: ‘Eteye ovarumendu tjiva ovanahanḓu nu ve kuminine Nabot kutja wa yamburura Mukuru nombara. Tjazumba pitiseye Nabot pendje yotjihuro mu ke mu zepe nomawe.’
Isebel tja zuva kutja Nabot wa koka, eye wa raera ku Ahab: ‘Nambano twende u kakambure otjikunino tje tjomivite.’ Ove ko nakuitavera kutja Isebel ma sokuverwa mena rotjiṋa otjivi ho tja tjita?
Okutja, kombunda yoruveze, Jehova wa hinda omurumendu Jehu okuyekumuvera. Indu Isebel tja zuva kutja Jehu me ya, eye we rihwa omiti komeho we nu wa kondjisa okuriṱuna kutja ma munike nawa. Nungwari indu Jehu tje ya na munu Isebel moruiho, eye wa ravaera kovarumendu mondjuwo youhona a tja: ‘Mu yumbeye pehi!’ Ovarumendu va tjita nao, otja tji mo munu motjiperendero. Owo ve mu yumba pehi, neye wa ṱa. Ingo ya ri omaandero wombara omurunde oserekaze Isebel.
