KALPASAN ipapatay ni Ari Jeroboam, tunggal ari a nagturay iti umamianan a 10 tribo a pagarian ti Israel ti dakes. Ni Ari Acab ti kadadaksan iti isuamin. Ammom kadi no apay? Ti maysa a dakkel a rason isu ni baketna, ti dakes a Reina Jezabel.

Saan nga Israelita a babai ni Jezabel. Isut’ anak a babai ti ari ti Sidon. Isut’ agdaydayaw iti ulbod a dios a ni Baal ket inallukoyna met ni Acab ken ti adu nga Israelitas nga agdayaw ken Baal. Kagura ni Jezabel ni Jehova ket pinapatayna ti adu kadagiti mammadtona.

Maysa nga aldaw maladingitan ni Ari Acab. Isu a dinamag ni Jezabel kenkuana no apay. Kuna ni Acab kenkuana: ‘Kayatko a gatangen ti kaubasan ni Nabot. Ngem imbagana a diak maala dayta.’

‘Dika agdanag,’ kuna ni Jezabel. ‘Alaek dayta para kenka.’

Gapuna inyurnos ni Jezabel para kadagiti sumagmamano nga lallaki nga agulbodda maipapan ken Nabot. Imbaga dagitoy a lallaki a ni Nabot inlunodna ti Dios ken ti ari. Gapu itoy, inuborda ni Nabot agingga a natay.

Apaman a naammuan ni Jezabel a natayen ni Nabot, kunana ken Acab: ‘Inka ken alaemon ti kaubasanna.’ Dika kadi umanamong a rebbeng a madusa ni Jezabel iti panangaramidna iti dayta a kinadakes?

Idi agangay, ni Jehova imbaonna ni Jehu a mangdusa kenkuana. Idi nangngeg ni Jezabel nga um-umayen ni Jehu, pinapintasna ti bagina. Ngem idi nakita ni Jehu ni Jezabel idiay bintana ti palasio, nagpukkaw kadagiti lallaki a kakadua ni Jezabel: ‘Isu ti itapuakyo!’ Nagtulnog dagiti lallaki, kas makitkitayo iti daytoy a retrato. Isu nga isut’ natnag ken natay. Daytoyen ti nagpatinggaan ni dakes a Reina Jezabel.