YEROBOAM si mat ai hpang e, ding dung lakung 10 Israela mungdan hpe uphkang ai hkawhkam shagu nkaja ai hkrai rai ma ai. Ahab gaw yawng hta nhkru dik ai hkawhkam re. Hpa majaw re ai hpe chye a ni? Madung ngu na gaw matse ai shi a hkawhkam jan Yezebela a majaw re.

Yezebela gaw Israela masha langai mi nre ai. Shi gaw Sidon hkawhkam a shayi sha re. Ahab hte Israela masha ni law law hpe mung Bala karai hpe nawku na matu galaw lu ai. Yezebela gaw Yehowa hpe nju ndawng ai num re. Yehowa a myihtoi law law hpe mung sat kau ai. Myihtoi nkau mi gaw sat kau nhkrum na matu, lungpu hku hkan e makoi nga ma ai. Yezebela gaw arai langai ngai mi hpe ra yang masha hpe pyi sat nna lu la hkra galaw ai.

Lani mi hta e, Ahab hkawhkam gaw myit grai n pyaw ai hte nga nga ai. Dai rai nna Yezebela gaw: ‘nang hpa rai myit n pyaw nga a ni?’ nga nna san ai.

‘Ngai hpe Nabot tsun ai ga a majaw re; shi a tsabyi sun hpe ngai mari la mayu timung shi gaw ndut ya lu ai nga ai,’ nga nna bai htan ai.

‘Hkum myit ru, dai tsabyi sun hpe na a matu lu hkra ngai galaw ya na,’ nga nna Yezebela gaw bai tsun ai.

Dai majaw Yezebela gaw Nabot nga ai mare kaw na du salang nkau mi hpang de laika ka dat ai. ‘Nabot gaw Karai Kasang hte hkawhkam wa hpe matsa kau ai ngu nna, hpa n hkaw ai masha ni hpe sakse hkam shangun nna Nabot hpe mare shingan de shapraw nhtawm nlung hte kabai sat kau mu,’ nga ai.

Nabot si mat sai lam hpe Yezebela na ai hte Ahab hpe tsun ai: ‘Rawt u, tsabyi sun hpe sa madu la nu,’ nga ai. Ndai zawn nhkru nkaja ai amu hpe galaw ai majaw Yezebela hpe ari jaw na n-ging dan a ni?

Dai majaw aten du jang Yehowa gaw Yehu hpe shangun dat nna Yezebela hpe ari jaw ai. Yehu sa wa ai lam hpe Yezebela na jang myi mun tsi chya ai hte, hkum hpe mawn sumli shatsawm dat ai. Raitimung Yehu du jang Yezebela hpe hkuwawt hku kaw e mu ai shaloi, htingnu e nga ai ala nkau mi hpe tsun dat ai: ‘Shi hpe kanawng jahkrat dat mu,’ nga ai. Dai ala ni Yehu a ga hpe madat nna, shi hpe kanawng jahkrat dat ma ai lam ndai sumla hta mu lu ai. Shanhte kanawng jahkrat dat nna, shi gaw si mat sai. Ndai gaw matse ai hkawhkam jan Yezebela a lam jahtum re.