ПАЩТЫХЬ Иеровоам лІа нэужь, Израиль лъэпкъипщІым и тепщэу щытхэр псори пащтыхь бзаджэщ. Абыхэм щыщу псом нэхърэ нэхъ бзаджэу щытар пащтыхь Ахавщ. ПщІэрэ сыт щхьэкІэми? Абы и щхьэусыгъуэ нэхъыщхьэу жыпІэ хъунур и фыз Езавел зэрыбзаджэ Іейращ.

Езавел Израилым щыщтэкъым. Ар Сидон пащтыхьым ипхъут. Ар езыр Ваал тхьэнэпцІым хуэлажьэу къэнэжкъым, абы Ахави нэгъуэщІ израиль цІыху куэди хегъэзыхь а тхьэнэпцІым хуэлэжьэну. Езавел илъагъу хъукъым Иеговэ. Абы и бегъымбар куэди еукІ. Адрейхэми бгъуэнщІагъхэм зыщагъэпщкІун хуей мэхъу, ямыукІын щхьэкІэ. Езавел зыгуэр щыхуейм деж ар зыІэригъэхьэн щхьэкІэ, цІыхуи хуэукІынущ.

Зэгуэр Ахав Іейуэ гукъыдэмыжти Езавел абы йоупщІ: «Сыт нобэ апхуэдизу ущІэнэщхъейр?»

— Навуфей къызжиІам щхьэкІэ,— жеІэри мэтхьэусыхэ Ахав.— Абы и жызум хадэр къэсщэхуну сыхэтати къызищэн хъуакъым.

— Умыгузавэт уэ — жреІэ абы Езавел,— къыпІэрыхьэнущ ар.

Арати, Езавел Навуфей щыпсэу къалэм я нэхъыщхьэ гуэрхэм письмо яхурегъэхь, унафэ яхуищІыу: «Алыхьымрэ пащтыхьымрэ ебгауэ сэбэпыншэ цІыху гуэрхэм Навуфей хужевгъэІи, къалэм къыдэфши лІэху мывэкІэ фыукІ».

Навуфей зэраукІар къызэрищІэу, асыхьэтым абы Ахав жреІэ: «ПсынщІэу кІуэи къащтэ абы и жызум хадэр». А щІэпхъаджагъэм щхьэкІэ абы тезыр хуэфащэкъэ?

Зэман дэкІа нэужь, Иеговэ абы тезыр трыригъэлъхьэну егъакІуэ Ииуй зи цІэ цІыхухъур. Ииуй абы и деж къызэрыкІуэр зэхиха иужь, Езавел и нэхэр елэри зыкъегъэдахэ. Ииуй къыІулъадэу щхьэгъубжэм къыдэплъу Езавел щилъагъум, пащтыхь унэм щІэт цІыхухъухэм йогуо: «Къевдзых, адэ!» Мы сурэтым зэрыщыплъагъущи, цІыхухъухэм абы и унафэр ягъэзащІэ. Абыхэм щхьэгъубжэм ар дадзри малІэ. Апхуэдэ щІыкІэкІэ пащтыхьым и фыз Езавел кІэ къыхуокІуэ.