PANYUMA ya lufu lwa Mfumu Yeloboma, bamfumu bonse baikelengapo pa bufumu bwa bena Isalela bwa ku kabeta ka ku buyeke bwa bisaka jikumi, batamine bingi. Mfumu Ahaba ye wakizhizhemo kutama pa bonse. Nanchi wayuka kyalengejile nyi? Kintu kikatampe kyalengejile ke mukazhanji, aye Yezebeli wajinga muka mfumu watama bingi.

Yezebeli kechi wajinga mwanamukazhi mwina Isalela ne. Wajinga mwana wa mfumu wa ku Shidona. Wapopwelanga Baela, lesa wa bubela kabiji waongwele Ahaba ne bena Isalela bavula nabo kutendeka kupopwela Baela. Yezebeli washikilwe bingi Yehoba kabiji ne kwipaya bangauzhi banji bavula. Bamo bafyaminenga mu bibwe kuchina’mba bakeya kwibepaya. Yezebeli waipayanga ne bantu baikalanga na bintu byo akebanga’mba ekale nabyo.

Juba jimo, Mfumu Ahaba waubile bingi bulanda. Onkao mambo, Yezebeli wamwipwizhe’mba: ‘Ki ka kimufichisha ku muchima lelo?’

Ahaba wakumbwile’mba: ‘Ku muchima kwafita na mambo a byambo byo aji kuñambila Nabota. Nakebelenga namba mpote bujimi bwanji bwa miñanzañanza, pano bino, aye wakaine.’

Yezebeli wamwambijile’mba: ‘Ikizhai muchima wenu. Amiwa nsakwimupabo bujimi bwanji.’

Onkao mambo, Yezebeli wanembele makalata ku babinemanga ba mu muzhi mwaikalanga uno mwanamulume Nabota. Wibambijile’mba: ‘Mukanengezhe banabalume bancha bakambe’mba, Nabota watukile Lesa ne mfumu. Apa bino, mukamutwale Nabota pangye ya muzhi ne kumwasa mabwe akafwe.’

Ponkapotu, Yezebeli byo aumvwine’mba Nabota wafwa, waambijile Ahaba amba: ‘Bukai mutambule bujimi bwa miñanzañanza.’ Nanchi waswa kuba’mba kya kine Yezebeli wafwainwe kukambulwa na mambo a kino kintu kyatama kyo aubile nyi?

Onkao mambo, pa kupitapo kimye, Yehoba watumine Yehu kuya na kumukambula. Yezebeli byo aumvwine’mba Yehu ubena kwiya, wipentele bya kwipentapenta ku meso anji ne kwiwamisha’mba amwekane bulongo. Bino Yehu byo afikile ne kumumona Yezebeli mu kipenze, waichile banabalume bajinga mu nzubo ya mfumu ne kwibambila’mba: ‘Mutayai munshi!’ Banabalume baubile byaambile Yehu, byonka byo wamona pa kipikichala. Bamutayile munshi kabiji ne kufwa wafwile. Ino yo yajinga mpelo ya muka mfumu watamine bingi, aye Yezebeli.