MƐƐ masaa Chɛloboam vi, masaa wɔɔŋnda kposoŋ sul ndu kɔɔli o kaala tɔlaŋ ba luaŋndo o Isɔluɛi niŋ ni. Masaa Ehaabi ndoo hiou a tuaa kpou wɔuleŋ. A sina le sabu koŋ? Sabu bɛndoo o pilɛ cho ni maa Chɛsibɛl laandɔ, masa laandu wɔɔŋndo o wa ni.

Chɛsibɛl ve Isɔluɛinɔ le. Finya ndɔ wa fal masa wa Saidɔŋndo ni. Mɛlɛka lachoowaa Baal Chɛsibɛl ndoo sooluu ni. Nduyɛ, mbo tiu pɔnɔ ndɔ a Isɔluɛitiiya tau ba le Baal sooloo. Chɛsibɛl ndoo nɔ bɔɔ yɛle tolaaleŋ le Jɛhowa, nduyɛ, mbo dii wanaa suaa le Mɛlɛka wa tau. O buululaŋ niŋ atiŋ ndaa viaŋnuŋ ni, yɔŋ o dii nda. Te Chɛsibɛl ndoo yeema nyɛ waŋndo pɛ, diyɔɔ wana koŋ pɛ mbo chua nyɛ kalaa.

Paale pilɛ, mi masaa Ehaabi tambu kɔl tau. Okoŋ mi Chɛsibɛl nyuna ndu aa: ‘Vɛ hau waa naa yɔluŋ?’

Mbo mulul ndu aa: ‘Nyɛ Nebɔɔ dimulla wo tosa ni mi tambu kɔl. Yaa yeema kpele ndɔɔ piondɔɔ. Kɛ mbo dimulla maa o cho ya ke le.’

Mi Chɛsibɛl dimul ndu aa: ‘Buulaŋ te, I cho num ndu ke.’

Le hei, mi Chɛsibɛl poonyiaa yauwo o masaa apum ndo o chiee Nebɔɔ wa wo niŋ aa: ‘La dimul puaa fondo fuu wa apum chiee loŋ le ma dimul Nebɔɔ maa o yei Mɛlɛka vɛlɛa masaa. Okoŋ mila soli Nebɔɔ chiee loŋ faŋ. Nduyɛ, mila vii vii ndu a poutaŋ haa mbo vi.’

Mɛɛ Chɛsibɛl sina dɔɔ maa Nebɔɔ vi, mbo dimul Ehaabi aa: ‘Kɔ chua niko kpele ndɔɔ.’ A chɛl naa maa Chɛsibɛl nɔ mbo sɔla nyɛ palaa le sɔɔŋ wɔɔŋ o tosa muŋndoŋ te?

O wa boondii pilɛ, mi Jɛhowa viam Chehu le Chɛsibɛl nyɛpalaa tuisio choo. Mɛɛ Chɛsibɛl tuei maa Chehu cho hunɔɔ, mbo yikpa hɔlaa nduaa a tiweiyo halikpeŋ mbo naŋ tau. Kɛ mɛɛ Chehu hiŋ mbo cha Chɛsibɛl o wundɛiyo, mbo dimul puaa cho o fondaŋ koŋ nda aa: ‘La nyindu ndu lɛŋ!’ Mi puaa haa diikuŋ, a mɛɛ ŋ cho naa chɔɔ o fotueiyo niŋ yɛ. Ma nyindu ndu lɛŋ mbo del kpɔl mbo wu pɛ. Mɛɛlula masa laandu wɔɔŋndo hoo lacho laŋ ni.