VAVA Yerobame wa ntinu kafwa, konso ntinu wayalanga kintinu kia makanda 10 ma Isaele wambi kaka kakalanga. O ntinu Akabi wasunda awonso o bi. Nga ozeye ekuma? Mu kuma kia kanz’andi, Izebele wa ntinu ankento ambi.

Izebele ke Nyisaele ko. Mwan’a ntinu a esi Sidone. Bale wa nzambi aluvunu kasambilanga. Wafila Akabi ye ulolo wa Aneyisaele mu sambila Bale. O Izebele kazolanga Yave ko, wavonda ulolo wa ngunza zandi. Akaka mu nduka bayiswekanga mu lembi vondwa. Avo Izebele ozolele lekwa wavanganga wawonso mu vwa kio kana nkutu vonda muntu.

Lumbu kimosi o Akabi okendalele kikilu. Izebele unyuvwidi: ‘Ekuma okendalele?’

Akabi ovutwidi vo: ‘Mu kuma kia Nabote. Nzolele sumba mpatu andi a vinyo. Kansi kazolele yo kuntekela ko.’

Izebele umvovese vo, ‘kutokani ko, ikuvana mpatu andi.’

I bosi, Izebele osonekene nkanda otwikidi wo kwa mbuta y’akwa zitu ana bazingilanga mun’evata dia Nabote. Owu kasoneka: ‘Nuvava yimpumbulu yole basia umbangi vo o Nabote otiangwini Nzambi yo ntinu. I bosi, numvaikisa muna mbanza nuamvondela muna matadi.’

Izebele vava kawa vo o Nabote ofwidi, ovovese Akabi vo: “Telama wabonga mpatu a Nabote.” Nga kukwikidi ko vo o Izebele ofwene tumbwa mu kuma kia bi wandi?

Oku kwalanda, o Yave otumini Yeu kenda kuntumba. Izebele vava kawa vo o Yeu olweke, olengele meso mandi, uyiviengese. Kansi, vava Yeu kalwaka, umwene vana zianela ovovese kwa wantu bakala muna lumbu lwa ntinu: “Nuntuba ovansi.” Balemvokele, nze una omwene muna fwaniswa kiaki. Bantubidi ovansi, ofwidi. I mpila kasukila Izebele wa ntinu ankento ambi.