Yezebeli—oku Onzi Opi Vule Ri
A’DIKO 66
Yezebeli—oku Onzi Opi Vule Ri
DRATA Yerobuamu ni ma vutia, opi dria enyati 10 suru Israelini ma o’oko andrale ru ri ma alea ’diyi ki dria onzi. Opi onzi ’diyi ma drilea woro ri Ahazi i. Mi ni a’du e’yo si’ari ra ya? A’dusiku ni oku onzi Opi vile Yezebeli ma e’yo si.
Yezebeli ovuni oku Israelio ru ni ku. Eri opi Sidonia ri ma izi i. Eri Mungu inzo ru Baali ni inzi, dika fe Ahazi pini ’ba Israeli ni kakau be Baali ni inzizu indi. Yezebeli ngu Yehova ni onzi dika o’di nabi erini ’diyi ma azi kakau eyi ra. Eyi ma azi nga eyi ozi oni egulea ’ba kazu eyi o’dizu ku risi. Yezebeli ka ndra afa azini le, eri ’ba ’di afa nde ’da isuzu.
O’du alu Opi Ahabu ni candisi. Yezebeli nga eri zi: ‘Mi andru candisi ’dini a’du e’yo si ya?’
Ahabu omvi kini: ‘A’dusikuni omvita Nabotu ni si. Ale ta eri vule amvu zabibu ni ri je. Te ’yo ma tia, ma econi ku.’
Yezebeli nga omvi kini: ‘Mi ma ora ku. Ma nga mini amvu ’da fe ra.’
Coti Yezebeli nga waraga si ’ba ’wara azini ’ba amboru aku Nabotu ni o’azuri ma alea ’diyi dri. ’Yo eyi tia: ‘Emi ’ba ’ba inzoru eri drilea, emi fe ma su asu inzosi eri rua ’yozu kini o’da Mungu pi opi be. Vutinia emi ji eri amve, emi o’be eri oni si, ma dra ra.’
Yezebeli ni erizu Naboti dra boria, nga ’yo Ahabu tia: ‘Mi mu, mu ’du eri vule amvu zabibu ni ri.’ Ada ada le Yezebeli ma isu panga e’yo onzi erini ’dasi ku ya?
Sawa were vutia, Yehova nga agu omvele Yehu i ri ma ti pe muzu panga fezu erini. Yezebeli ni erizu Yehu ni emu ria, nga ima mile o’be rangi si azini osu i rua afa ndu ndu ini e’dazu ndrizaru beni. Yehu ni ecaria ’bo, ne Yezebeli ni derisa, coti nga ’yo ’ba eri vule joa ’diyi tia: ‘Emi e’be eri va!’ ’Ba nde ’diyi obi azita ’da ma vuti ra ekile mi ni ne e’da ma alea ’dale. E’be ki eri va, nga dra ra. ’Diri asiza oku onzi opi vile Yezebeli ni ri.
