STORJA 66
Ġeżabel—Reġina mill-Agħar
WARA li jmut is-Sultan Ġerobogħam, kull sultan li jaħkem is-saltna t’Iżrael fit-Tramuntana b’10 tribujiet ikun ħażin. L-agħar sultan minnhom kollha hu s-Sultan Aħab. Taf għala? Raġuni kbira waħda hi l-mara tiegħu, ir-reġina mill-agħar Ġeżabel.
Ġeżabel mhijiex mara Iżraelija. Hi t-tifla tas-sultan taʼ Sidon. Tqim lill-alla falz Bagħal, u ġġiegħel lil Aħab u lil ħafna Iżraelin biex ukoll iqimu lil Bagħal. Ġeżabel tobgħod lil Ġeħova u toqtol ħafna mill-profeti tiegħu. Oħrajn ikollhom jistaħbew fl-għerien ħalli ma jinqatlux. Jekk Ġeżabel tkun trid xi ħaġa, hi lesta li anki toqtol lil xi ħadd biex tiħodha.
Ġurnata waħda, is-Sultan Aħab ikun imdejjaq ħafna. Allura Ġeżabel tistaqsih: ‘Għala int imdejjaq illum?’
‘Minħabba dak li qalli Nabot,’ iwieġeb Aħab. ‘Ridt nixtri l-għalqa tad-dwieli tiegħu. Imma qalli li ma nistax niħodha.’
‘Tinkwieta xejn,’ tgħidlu Ġeżabel. ‘Dalwaqt tkun tiegħek.’
Mela, Ġeżabel tikteb xi ittri lil uħud mill-irġiel ewlenin fil-belt fejn jgħix dan ir-raġel Nabot. Tgħidilhom: ‘Qabbdu xi rġiel li m’huma tajbin għal xejn biex jgħidu li Nabot seħet lil Alla u lis-sultan. Imbagħad, ħudu lil Nabot ’il barra mill-belt u ħaġġruh.’
Malli Ġeżabel issir taf li Nabot inqatel, tgħid lil Aħab: ‘Issa mur u ħudlu l-għalqa tad-dwieli.’ Ma taqbilx li Ġeżabel għandha tiġi kastigata talli għamlet din il-ħaġa tant terribbli?
Għalhekk, maż-żmien, Ġeħova jibgħat lil Ġeħu biex jikkastigaha. Meta Ġeżabel tismaʼ li ġej Ġeħu, tiżbogħ għajnejha u tipprova tirranġa lilha nfisha ħalli tidher sabiħa. Imma meta jiġi Ġeħu u jara lil Ġeżabel fit-tieqa, hu jsejjaħ lill-irġiel fil-palazz u jgħidilhom: ‘Itfgħuha għal isfel!’ L-irġiel jobdu, kif tistaʼ tara fl-istampa. Huma jitfgħuha għal isfel u tmut. Dan hu t-tmiem tar-reġina mill-agħar Ġeżabel.