TÁNDI̱ʼI ni̱xi̱ʼi̱ ta̱ rey Jeroboán, na̱ rey na̱ xa̱ʼndachíñu nu̱ú na̱ 10 ñuu Israel, su̱ví rey va̱ʼa níxikuuna. Ta̱ rey Acab, ta̱yóʼo kúú ta̱ ndi̱va̱ʼaka ni̱xi̱yo ini nu̱ú ndiʼina. ¿Á xíni̱ún ndachun ni̱xi̱yora saá? Saá ni̱xi̱yora chi ñá síʼíra ñá Jezabel, iin reina ndi̱va̱ʼa-ini xi̱kuuñá.

Ñá Jezabel su̱ví ñá ñuu Israel kúúñá. Ñá se̱ʼe ta̱ rey ñuu Sidón kúúñá. Ta ndióxi̱ vatá ndásakáʼnuñá ña̱ naní Baal, ta sa̱xinu̱ñá ini yiíñá ta̱ Acab xíʼin ku̱a̱ʼá na̱ ñuu Israel ña̱ ndasakáʼnuna ndióxi̱ yóʼo. Ni loʼo kǒo kúni̱ñá xíniñá Jehová ta ku̱a̱ʼá na̱ profetara xáʼníñá. Ta ku̱a̱ʼána chíse̱ʼéna miína nda̱a̱ ini kavá ña̱ va̱ʼa ka̱kuna. Chi nda̱a̱ xáʼníñá savana ña̱ va̱ʼa koo ña̱ kúni̱ miíñá.

Iin ki̱vi̱ ta̱ rey Acab kǒo íyo si̱í-inira. Ñá Jezabel ni̱nda̱ka̱tu̱ʼunñára: ʼ¿Ndachun kǒo íyo si̱í-iniún?ʼ

ʼXa̱ʼa ña̱ ni̱ka̱ʼa̱n ta̱ Nabot xíʼi̱nʼ, kachi ta̱ Acab. ʼChi kúni̱i̱ sa̱tái̱ ñuʼúra ta kǒo níxiinra xi̱kóraña nu̱íi̱ʼ.

ʼKǒo kundi̱ʼi̱-iniún chi yi̱ʼi̱ taxiña ndaʼúnʼ, káchi ñá Jezabel xíʼinra.

Ñá Jezabel ka̱ʼyíña iin carta ku̱a̱ʼa̱n nu̱ú na̱ xi̱ku̱aʼa na̱ ndóo ñuu nu̱ú íyo ta̱ Nabot. Ta carta yóʼo káchiña: ʼNdukúndó ta̱a na̱ kǒo íxato̱ʼó Ndióxi̱ ná ka̱ʼa̱nna xa̱ʼa ta̱ Nabot ña̱ ni̱ka̱ʼa̱n ndi̱va̱ʼara xa̱ʼa Ndióxi̱ xíʼin xa̱ʼa ta̱ rey. Ta tavándóra chi nu̱ú ñuu ta kuunndó yu̱u̱ miíra nda̱a̱ ná kuviraʼ.

Tá na̱kunda̱a̱-ini ñá Jezabel ña̱ ni̱xi̱ʼi̱ ta̱ Nabot, ni̱ka̱ʼa̱nñá xíʼin ta̱ Acab: ʼVitin kuaʼán ta ndakiʼún ñuʼúra koo ñuʼúnʼ. Ñá Jezabel xíniñúʼu ndakiʼinñá castigo xa̱ʼa ña̱ ke̱ʼéñá.

Tasaá ni̱ya̱ʼa tiempo ta chi̱ndaʼá Jehová iin ta̱a ta̱ naní Jehú ña̱ taxira castigo ndaʼa̱ñá, tá na̱kunda̱a̱-iniñá ña̱ va̱xi ta̱ Jehú, livikaví ka̱ʼyíñá nu̱úñá ña̱ va̱ʼa ná kuna̱ʼa̱ñá. Tá ki̱xa̱a̱ ta̱ Jehú ta xi̱nira miíñá chí ventana, káchira xíʼin ta̱a na̱ ñúʼu ini veʼe kán: ʼSakánandóñá chí ventanaʼ, ta na̱yóʼo ke̱ʼéna ña̱ ni̱ka̱ʼa̱nra xíʼinna táki̱ʼva xítoún nu̱ú na̱ʼná yóʼo. Sa̱kánanañá ta ni̱xi̱ʼi̱ñá. Tasaá ndi̱ʼi-xa̱ʼa ñá reina ndi̱va̱ʼa-ini.