KONYIMA yononkhia mbohamba Jeroboau, onohamba ambuho mbatumina omihoko 10 vio Isilayeli, ankho onondingavivi. Ohamba Akabe ankho ondingavivi vali unene tyipona onohamba ambuho. Ove utyii omokonda yatyi? Ehunga limue enene, omokonda yomukai wae, ondingavivi Jezabele.

Jezabele ankho hamu Isilayeli ko. Ankho omona wohamba yoko Sidon. Jezabele ankho ufenda Mbaale, o huku yomatutu. Iya ayapula Akabe nova Isilayeli ovanyingi, navo avahimbika okufenda Mbaale. Jezabele ankho uyele Yehova. Moluotyo, waipaa ovauli ovanyingi va Yehova. Iya ovakuavo avakaholama momaleva opo vahaipawe. Putyina ankho Jezabele ahanda otyipuka tyimue, wipaa muene watyo, iya otyipuka otyo atyilingi tyae.

Onthiki imue Ohamba Akabe ankho wanumana unene. Iya Jezabele emupulu okuti; ‘Omokonda yatyi wanumanena hono?’

Akabe emukumbulula okuti: ‘Omokonda yetyi tyantholela Nabote. Ame ankho nahanda okulanda eepia liae. Iya oe wamphopila okuti katyitavela.’

Jezabele emupopila okuti: ‘Wahasukalale malilingi liove, ame mandyityivili.’

Iya, Jezabele ahonekela omikanda kononkhalamutue mbepundaumbo ankho mukala Nabote. Ati: ‘Taindyei ovanthu vamue vahasilivila, opo vatendeleye Nabote okuti wahingana Huku nohamba.’ Iya amutuala Nabote kondye yepundaumbo, amumuipaa nomamanya.’

Etyi Jezabele etyiiva okuti Nabote wankhia, atolela Akabe okuti: ‘Pahe enda eepia lia Nabote o liove.’ Jezabele katokalele okuhitiswa mokonda yotyipuka otyo otyivi alinga?

Moluotyo, Yehova konyima watuma Jeú opo akahitise Jezabele. Etyi Jezabele eiva okuti Jeú ukahi nokuiya, elivaleka nawa, nokulipindala komaiho no komulungu okulihiwisa nawa. Mahi, Jeú etyi ehika, wamonena Jezabele pondyanena, iya aihana ovalume ankho vekahi kombala yae kosapalalo ati: ‘Yumbei Jezabele pohi.’ Iya ovalume ovo avetavela, ngetyi weete polutalatu apa. Avemuyumbu pohi okutunda kosapalalo, iya Jezabele ankhi. Eli, olio ehulilo lia Jezabele Onkhai-hamba yondingavivi.