MEKƐ mɔɔ Belemgbunli Gyɛlɔbowam wule la, arelemgbunli mɔɔ lile Yizilayɛ sɔlɔ mbusua 10 belemgbunlililɛ ne azo la biala yɛle ninyɛndane. Belemgbunli Ehabe ɛdeɛ ne bo bɛ muala bɛ nwo zo. Ɛze mɔɔ manle ɔrale ye zɔ la ɔ? Mɔɔ manle ɔrale ye zɔ la a le ɔ ye Gyɛzɛbɛle, Belemgbunli Raalɛ atisesebɛ ne.

Gyɛzɛbɛle ɛnle Yizilayɛnli raalɛ. Saedɛn belemgbunli ne ara raalɛ ɔ? Ɛnee ɔsonle adalɛ nyamenle Beeyale na ɔmanle Ehabe nee Yizilayɛma dɔɔnwo noko zonlenle Beeyale. Ɛnee Gyɛzɛbɛle kpɔ Gyihova na ɔhunle ye ngapezoma ne anu dɔɔnwo. Bie mɔ hɔveale bolɛ bɔne nu amaa bɛangu bɛ. Saa Gyɛzɛbɛle kpondɛ debie avi awie ɛkɛ ne na ɔ sa ɛnga ye a, ɔku ahenle ne bɔbɔ na ɔdie.

Kenle ko Belemgbunli Ehabe arɛle bɔle. Ɔti Gyɛzɛbɛle bizale ye kɛ: ‘Duzu ati a ɛ rɛle ɛbɔ a?’

Ehabe buale kɛ: ‘Mɔɔ Neebɔto zele me la ati ɔ. Ɛnee mekulo kɛ metɔ ye vanye ɛya ne. Noko ɔse ɔfa ɔmaa me a ɔnyɛ boɛ.’

Gyɛzɛbɛle se: ‘Mmadwenle nwo. Mebalie meamaa wɔ.’

Yemɔti Gyɛzɛbɛle hɛlɛle ngɛlata nwanle mgbanyima mɔɔ nee Neebɔto wɔ sua ne azo la. Ɔhanle ɔhilele bɛ kɛ: ‘Bɛkpondɛ mrenya mɔɔ nvasoɛ ɛnle bɛ nwo zo la na bɛmaa bɛdo Neebɔto ɛzonle kɛ yewa Nyamenle nee belemgbunli ne amonle. Na akee bɛva Neebɔto bɛhɔ suakpole ne anzi na bɛzi ye awolɛ bɛhu ye.’

Mekɛ mɔɔ Gyɛzɛbɛle dele kɛ Neebɔto ɛwu ala la, ɔzele Ehabe kɛ: ‘Dwazo na kɔva ye vanye ɛya ne.’ Asoo ɛnlie ɛndo nu kɛ Gyɛzɛbɛle fɛta anzohwenlɛ wɔ ɛtane kpole ɛhye anwo ɔ?

Yemɔti, mekɛ hɔle bie la, Gyihova zoanle Gyihu manle ɔhɔhwenle ɔ nzo. Mekɛ mɔɔ Gyɛzɛbɛle dele kɛ Gyihu ɛlɛba la, ɔhehanle ɔ nye anzi na ɔbɔle mɔdenle kɛ ɔmaa ɔ nwo ayɛ fɛ kpalɛ. Noko mekɛ mɔɔ Gyihu ranwunle Gyɛzɛbɛle kɛ ɔgyi nvɛzɛlɛ ne anu la, ɔvɛlɛle menli mɔɔ wɔ belemgbunli sua nu ɛkɛ ne la bie kɛ: ‘Bɛvuandi ye bɛde ye aze!’ Menli ne yɛle ye zɔ, kɛmɔ ɛnwu ye wɔ nvoninli ye anu la. Bɛvuandinle ye bɛdele aze na ɔwule. Belemgbunli Raalɛ Gyɛzɛbɛle atisesebɛ ne awieleɛ ɛne.