CHIʼ kamnäq chi ri Jeroboán, konojel ri täq xkebʼan ajawinel puwiʼ ri 10 tribus rech Israel sibʼalaj e itzel. Acab are jun ajawinel che sibʼalaj xubʼan itzel che kiwäch ri nikʼaj chik. ¿La awetaʼm suche? Jun rumal are rixoqil Jezabel ubʼiʼ.

Jezabel aj israelita täj. Jezabel are umiʼal ri ajawinel rech Sidón. Areʼ kuya uqʼij jun tyox ubʼiʼ Baal, rumal laʼ xubʼan che Acab xuqujeʼ chike kʼi täq israelitas che xkeya uqʼij Baal. Jezabel, itzel xril Jehová xuqujeʼ xeʼukamsaj kʼi chike ri täq ajqʼaxal utzij Jehová. Nikʼaj chike rajawaxik xkekʼu kibʼ chupam täj jul rech xekam täq. Ri Jezabel we kraj jun jasach, o kos, kukamsaj winaq rech kuriqo.

Pa jun qʼij ri ajawinel Acab sibʼalaj kbʼisonik. Rumal waʼ Jezabel xuta wariʼ che: ‹¿Suche sibʼalaj katbʼison kimik?› Xchaʼ che.

‹Rumal ri xubʼij Nabot chwe›, xchaʼ Acab. ‹In kwaj kinloqʼ rulew. Tekʼuriʼ areʼ xubʼij chwe che kuya täj.›

‹Weyej na›, xchaʼ Jezabel che. ‹In kinya chawe›, xchaʼ che.

Rumal waʼ Jezabel xutzʼibʼaj bʼi täq wuj chike ri täq achijabʼ che nim kibʼanik e kʼo jachiʼ, o ni, kʼo wi Nabot. ‹Chabʼij chike nikʼaj achijabʼ che kʼot kipatan, che kkebʼij Nabot xuxutuj ri Ajawaxel xuqujeʼ ri ajawinel›, xuqujeʼ xubʼij chike. ‹Kewesaj bʼi pa ri tinamit xuqujeʼ kikamsaj rukʼ abʼaj.›

Chiʼ Jezabel xuta che kamnäq chi ri Nabot, xubʼij wariʼ che Acab: ‹Wa kimik jat chakʼama ri ulew›, xchaʼ. Su kabʼij at ¿la rajawaxik che kkʼajsax uwäch ri Jezabel rumal che xubʼan wajun nimalal itzelal?

Rumal laʼ chiʼ qʼaxnäq chi kebʼ oxibʼ qʼij Jehová xutaq bʼi jun achi ubʼiʼ Jehú che ukʼajsaxik uwäch. Chiʼ Jezabel xuta che Jehú petinäq chik, xutzʼaj ri ubʼaqʼwach xuqujeʼ xraj che sibʼalaj utz kkaʼyik. Tekʼuriʼ chiʼ Jehú xpetik xril pa ri ventana, xubʼij chike ri achijabʼ ri e kʼo rukʼ: ‹¡Chikʼaqa loq!› Xchaʼ chike, wa täq achijabʼ riʼ are xkebʼano su xubʼij chike, chawilaʼ pa ri wachbʼäl. Xkekʼaq loq, ri Jezabel xkamik. Je wariʼ xkʼis ukʼaslemal ri itzelalaj Jezabel.