MURI ake i te mate anga te Ariki ko Ieroboama, e au ariki kino pouroa tei tutara i te patireia apatokerau o te kopu 10 o Iseraela. Ko te Ariki ko Ahaba te ariki kino roa atu. Kua kite koe eaa te tumu? Te tumu maata, no tana vaine ko te Ariki Vaine kino ko Iezebela.

Kare a Iezebela i te vaine Iseraela. E tamaine aia na te ariki o Sidona. E akamori ana aia i te atua pikikaa ko Baala, e nana i maani ia Ahaba e te au Iseraela e manganui kia akamori ia Baala. E riri ana a Iezebela ia Iehova e kua tamate i tona au peroveta e manganui. Kua pipini tetai pae ia ratou ki roto i te au ana kia kore ratou e tamateia. Me inangaro a Iezebela i tetai apinga, ka tamate aia i te tangata kia rave i te reira.

Tetai ra kua taitaia te Ariki ko Ahaba. No reira kua ui a Iezebela kiaia e: ‘Eaa koe i taitaia ei i teia ra?’

‘No te tuatua a Nabota kiaku,’ i pau mai ei a Ahaba. ‘Inangaro au i te oko i tona kainga vine. Tera ra akakite mai aia e kare e tika iaia.’

‘Eiaa e manamanata,’ i karanga ai a Iezebela. ‘Naku e oronga atu i te reira naau.’

I reira kua tata a Iezebela i te au reta ki tetai au tangata mamaata i roto i te oire e noo ra a Nabota. ‘Tiki i tetai aronga kanga aere ua kia tuatua e kua akakino a Nabota i te Atua e te ariki,’ i akakite ei aia kia ratou. ‘E oti apai ia Nabota ki vao ake i te oire, pei iaia ki te toka kia mate.’

Te kite anga a Iezebela e kua mate a Nabota, kua karanga aia kia Ahaba e: ‘Teianei aere koe e rave i tona kainga vine.’ Kare ainei koe e akatika e kua tau rai a Iezebela kia akautungaia no tei rave i taua angaanga kino ra?

I te tuatau i aereia, kua tono a Iehova ia Iehu kia akautunga ia Iezebela. I te akarongo anga a Iezebela e te aere maira a Iehu, kua peni aia i tona mata e kua akamanea iaia kia akaraanga manea. Inara i te tae anga mai a Iehu e te kite anga atu ia Iezebela i roto i te maramarama, kua kapiki atu aia ki te au tangata i roto i te are ariki e: ‘Pei mai iaia ki raro!’ Kua akarongo te au tangata, mei taau e kite ra i roto i te tutu. Kua pei mai ratou iaia ki raro e kua mate aia. Ko te openga teia o te Ariki Vaine kino ko Iezebela.