NDA̱WA̱Á rí nikháñu rey Jeroboán, mámbáa rey bi̱ naʼtañajunʼ náa 10 xuajin ma̱jkha̱ʼ ndrígóo Israel rí naguanúu xígií náa norte nanindxu̱u̱ mbáa Xa̱bu̱ Ñajunʼ bi̱ ra̱májánʼ. Rey Acab bi̱ phú ra̱májánʼ wéñuʼ. Lá natayáá náa numuu ráʼ. Mbá numuu ñajunʼ aʼgiu̱u̱ bi̱ nagumbiʼyuu Jezabel, reina bi̱ ra̱májánʼ wéñuʼ.

Jezabel na̱nguá ni̱ndxu̱u̱ mbáa aʼgú israelita. A̱ʼdióo rey bi̱ xtáa náa Sidón. Ndaʼyamajkhuu dios bi̱ ragájkhun bi̱ nagumbiʼyuu Baal, ga̱jma̱a̱ naʼni rí Acab gajmíi̱n mbaʼin israelitas mbuyamajkuíí Baal. Jezabel nakiʼnáa mbanda̱ʼkho kaʼyoo Jeobá ga̱jma̱a̱ nagudíin mbaʼin xa̱bu̱ gaʼyee ndrígóo Jeobá. Eʼwíínʼ nurkaʼumijna náa tsíñu mu xúradíin. Jezabel asndu maxíyáa mbáa xa̱bu̱ mu magiʼdoo rí eyoo.

Mbóo mbiʼi rey Acab xtáa gíná wéñuʼ. Ikha jngó Jezabel naʼniu graxe̱: ‹Náa numuu rí xtaa gíná mbiʼi rígi̱ rá.›

Acab nariʼña: ‹Xtáá gíná ga̱jma̱a̱ numuu rí niʼthúnʼ Nabot. Ikhúúnʼ nindoʼ matsi mbaaʼ ndrígóo náa naʼdu uva. Mú ikhaa niʼthúnʼ rí xándoo matsi›.

Jezabel naʼthí: ‹Xáxmiéjuanʼ. Ikhúúnʼ mani̱ dí maraʼdáá mbaaʼ rúʼko̱›.

Ikha jngó Jezabel naʼnirámáʼ mbaʼa i̱yi̱i̱ʼ rí maʼga̱ náa xa̱bekha bi̱ ku̱ya̱ edxu̱u̱ náa xuajin rí xtáa Nabot. Jezabel naʼthún: ‹Guni rí tikhun xa̱bekha bi̱ na̱nguá ejmaa rí enii mu muthi rí Nabot niʼthá wéñuʼ Dios ga̱jma̱a̱ náa rey. Ndawaá gagajnala ku̱ya̱a̱ náa xuajin mu muxíyáa ga̱jma̱a̱ itsí›.

Nacha̱ má índo̱ Jezabel naʼdxun rí Nabot nikháñu, ikhaa naʼthúu̱n Acab: ‹Rí xúgi̱ ma̱ndoo mi̱dxu̱ʼ ga̱jma̱a̱ gaʼni ndrígáʼ mbaaʼ náa naʼdu uva›. Lá nanguá tatsaʼwáminaʼ rí Jezabel gíʼmaa makhánaa mbá castigo numuu rí niʼni ra̱májánʼ wéñuʼ ráʼ.

Ikha jngó, Jeobá nda̱wa̱a nakuʼmaa mbáa xa̱biya̱ bi̱ nagumbiʼyuu Jehú mu maxnúu castigo. Índo̱ Jezabel ndaʼyoo rí na̱ʼkha̱ Jehú, nanííʼ iduu ga̱jma̱a̱ naʼni makujmaa rí mitsiʼyáa. Mú índo̱ Jehú na̱ʼkha̱ ga̱jma̱a̱ ndaʼyoo rí Jezabel gíiʼ náa ventana, naʼthúún xa̱bu̱ bi̱ kuwa náa palacio: ‹¡Gujmatiguíi!›. Ikhiin nunimbu̱ún, xóo má tayáá náa kiʼniriyaʼ. Ikhiin nujmatiguíi, ga̱jma̱a̱ ikhaa nakháñuu. Xúʼko̱ kaʼnii nikháñu reina Jezabel bi̱ ra̱májánʼ wéñuʼ.