DEPOIS Liurai Jeroboão mate tiha, liurai hotu neʼebé ukun reinu Izraél suku sanulu iha norte halo hahalok aat. Liurai Acab mak liurai neʼebé aat liu sira hotu. Hatene tanbasá? Razaun boot ida tanba ninia feen, Liurai-Feto Jezabel mak aat tebes.

Jezabel laʼós ema Izraél. Nia mak liurai Sidon nia oan-feto. Nia adora maromak falsu naran Baal, no nia mós halo Acab no ema Izraél barak adora Baal. Jezabel odi Jeová no oho ninia profeta barak. Ema seluk tenke subar an iha fatuk-kuak atu moris. Kuandu Jezabel hakarak sasán ruma, nia sei oho ema atu hadau sasán neʼe.

Loron ida, Liurai Acab sai triste tebes. Tan neʼe, Jezabel husu: ‘Tanbasá mak ó triste?’

Acab hatán: ‘Tanba buat neʼebé Nabot hatete mai haʼu. Haʼu hakarak hola ninia toʼos-uvas. Maibé, nia hatete katak haʼu la bele hola toʼos neʼe.’

Jezabel hatete: ‘Keta laran-susar. Haʼu sei foti tiha toʼos neʼe.’

Jezabel hakerek surat ba xefe sira iha sidade neʼebé Nabot hela. Nia haruka: ‘Haruka ema aat balu atu hatete katak Nabot koʼalia aat hasoru Maromak no liurai. Depois, lori Nabot sai husi sidade neʼe no tuda mate tiha nia.’

Kuandu Jezabel rona katak Nabot mate tiha ona, nia hatete kedas ba Acab: ‘Agora, bá no foti ninia toʼos-uvas.’ Ó mós sente katak Jezabel tenke simu kastigu tanba hahalok aat hanesan neʼe, loos ka lae?

Lakleur, Jeová haruka mane ida naran Jeú atu fó kastigu ba nia. Kuandu Jezabel rona katak Jeú atu besik mai ona, nia pinta ninia matan no halo ninia an furak. Maibé, kuandu Jeú hakbesik no haree Jezabel iha janela, nia haruka atan sira iha palásiu: ‘Soe tun tiha mai!’ Atan sira halo tuir hanesan ó haree iha dezeñu neʼe. Sira soe tun nia, no nia mate. Hanesan neʼe mak Liurai-Feto Jezabel neʼebé aat nia moris ramata.