AKAULO na atwania Yeroboam, edio kabaka kere lo epugai ajakanut na atekerin 10 naka agolitomei na Isirael arai lo arono. Ekabaka Akab nges arai lo arono aitelekar kere. Ijeni ijo kanukinyo? Ibore idiope yen apol noi nges ekeberu, Yesebel Akabaka naronon.

Mam Yesebel arai aberu na Isirael. Arai Yesebel akoku naka ekabaka loka Sidon. Amaenenei Baal edeke lokaisab, ido abu kitingaik Akab ka idwe luka Isirael luipu aima Baal. Angara Yesebel Yawe ido abu koar inabin ke luipu. Arai ekotokin Yesebel icebore, apedori ngesi aayar itunganan da anu adumun ibore ngin.

Adiopepaaran, anyunyura Ekabaka Akab noi. Ingit Yesebel ngesi ebe: ‘inyobo inyunyra lolo ijo?’

Kobongok Akab ebe: ‘Naarai kanu abongok Nabos eong. Akoto eong agwela emanikor ke lo emusabibu. Konye alimoki ngesi eong ebe mam eong epedori adumun.’

Kobala Yesebel ebe: ‘siriyalongog, adumakini eong ijo.’

Aso kiwadik Yesebel ibaluan nejaas ikapolok luka ore loeboio Nabos. Kobala ebe: ‘Kolemu itunga iarei luemamei ajokis, kitoronata Nabos ebe abu kiken Edeke ka Ekabaka da. Koyangasi konyet Nabos kinga naka ere, kibiribiroto kamoru, kotwana.’

Kosodi kanen, kiira Yesebel ebe atwana Nabos, kolimok Akab atiar: ‘Konyou, kirum ekemanikor loka emusabibu.’ Mam kereka ijo icamuni ebe ebusakinit aitisilar Yesebel kanu aswam akirot nakaronon kaana?

Etubor apak, ijuka Yawe etunganan lo anyaritai Yeku aitisilar nges. Kepupu Yesebel ebe ebunit Yeku, abu ojuk akekonye ido kotam aisub bala ibus ngesi. Konye edolu Yeku kosodi aanyun Yesebel adirisa, abu kiworok itunga lueboiete ore ekabaka ebe: ‘Kocakutu ngin kwap!’ Apotu itunga ngul orimasi kwape iteio ijo kotoma aputo kana. Apotu kocakasi ngesi kwap, ido kotwana. Na ngesi awasia naka Akabaka Yesebel nakaronon.