Makani 66: Jezebeli Mwami Mukaintu Mubi
AFWE Mwami Jelobowamu, kufwumbwa mwami walela bwami bwakunyika bwamisyobo iili 10 yabana Isilayeli wakali mubi. Mwami Ahabu ngomwami wiinda kubija kubami boonse. Hena ulicizyi cakapa kuti ainde kubija? Nkaambo kamukaintu wakwe, Mwami Mukaintu mubi Jezebeli.
Jezebeli tali mukaintu muna Isilayeli. Mwana wamwami waku Sidoni. Ukomba leza wakubeja Bbaala, alimwi wapa kuti Ahabu abana Isilayeli banji bakombe Bbaala abalo. Jezebeli tamuyandi Jehova amwainda alimwi uli bujisi kujaya basinsimi bakwe. Ibamwi balayuba mumpako zyamabwe kutegwa batajaigwi. Ikuti Jezebeli kayanda cintu, ulakonzya kujaya muntu kutegwa acibweze.
Buzuba bumwi Mwami Ahabu wakali uuside kapati. Kumane Jezebeli wamubuzya kuti: ‘Ino nkaambo nzi ncouside sunu?’
Ahabu waingula kuti: ‘Nkaambo kacintu Naboti ncaandaambila. Ndali kuyanda kuula muunda wakwe wamasaansa. Pele wandaambila kuti tandikonzyi kuwuula pe.’
Jezebeli wati: ‘Utapengi, ndilakugwasya kuubweza.’
Aboobo Jezebeli walemba magwalo kubapati-pati bamumunzi oomo mukkala Naboti. Wabaambila kuti: ‘Amwiite bantu babi kuti bamubejelezye Naboti kuti watukila Leza alimwi amwami. Mwamana mumuzwisye Naboti mumunzi mumupyaye mabwe kusikila afwe.’
Jezebeli mbwaakamvwida buyo kuti Naboti wafwa, wati kuli Ahabu: ‘Koya lino ukabweze muunda wakwe wamasaansa.’ Hena twaazumini makani aaya kuti Jezebeli uleelede kusubulwa akaambo kacintu eeci cibi ncaacita?
Aboobo kwiinde ciindi Jehova watuma Jehu kuti akamusubule Jezebeli. Jezebeli amvwe kuti Jehu ulaboola, walipenta-penta kumeso akusama kabotu kabati mbaabo babotu. Pele Jehu waboola akumubona Jezebeli ampulungwido, eelyo waita basankwa bali muŋanda yamwami wati: ‘Amumulosye ansi!’ Basankwa batalika kumunyamuna mbuli mbobona acifwanikiso. Bamuwaala ansi, eelyo wafwa. Aaya ngamamanino aa Mwami Mukaintu mubi Jezebeli.
1 Bami 16: 29-33; 18:1-4; 21:1-16; 2 Bami 9:30-37.
Mibuzyo
- Ngwani Jezebeli?
- Nkaambo nzi Mwami Ahabu ncaakauside buzuba bumwi?
- Wakacita buti Jezebeli kutegwa akonzye kubwezya muunda wa Naboti kubwezyela munyokwabo Ahabu?
- Ngwani Jehova ngwaakatuma kuti akamusubule Jezebeli?
- Kweelana ambobona acifwanikiso, ncinzi cacitika Jehu naasika aŋanda yamwami Jezebeli?
Mibuzyo aimwi
- Bala 1 Bami 16:29-33 a 18:3, 4.
Ino bwakali buti buumi mu Isilayeli naakali kulela Mwami Ahabu? (1 Bam. 14:9)
- Bala 1 Bami 21:1-16.
Mbuti Naboti mbwaakatondezya busicamba akusyomeka kuli Jehova? (1 Bam. 21:1-3; Lev. 25:23-28)
Ncinzi ncotukonzya kwiiya kwiinda mucikozyanyo ca Ahabu caboola kumakani aakutyompwa? (1 Bam. 21:4; Balo. 5:3-5)
- Bala 2 Bami 9:30-37.
Ncinzi ncotukonzya kwiiya kubusungu bwa Jehu bwakucita kuyanda kwa Jehova? (2 Bam. 9:4-10; 2 Kor. 9:1, 2; 2 Timo. 4:2)
Andiza Inga Mwaakkomanina Ayaaya
ZYAKUCITA ZIJATIKIZYA KWIIYA BBAIBBELE
Leza Uusulaika Kutalulama
Amukkope cakacitika eeci akubona nzyomukonzya kwiiya kuzwa kumakani aajatikizya Ahabu, Jezebeli, Naboti, alimwi a Elija.
