Khosi Yerobeamu o no fa, khosi iṅwe na iṅwe ye ya vhusa muvhuso wa devhula wa tshaka dza 10 dza Isiraele yo vha i mmbi. Khosi Ahaba o vha a tshi fhira dzoṱhe nga vhuvhi. Tshiitisi tshihulwane o vha e musadzi wawe, Mufumakadzi muvhi Isebele.

Isebele o vha a si Muisiraele. O vha e ṅwananyana wa khosi ya Sidoni. O vha a tshi rabela mudzimu u sili Baali, nahone a ita uri Ahaba na vhaṅwe Vhaisiraele vhanzhi na vhone vha rabele Baali. Isebele o vha a tshi vhenga Yehova nahone a tshi vhulaha vhanzhi vha vhaporofita vhawe. Isebele o vha a tshi ita na u vhulaha muthu uri a wane tshe a vha a tshi tshi ṱoḓa.

Ḽiṅwe ḓuvha Khosi Ahaba o vha o ṱungufhala zwihulu. Isebele a mu vhudzisa: ‘Ndi ngani wo ṱungufhala ṋamusi?’

Ahaba a fhindula: ‘Nga mulandu wa zwe Nabothe a amba kha nṋe. Ndo ṱoḓa u renga tsimu yawe ya nḓirivhe. Fhedzi o nnzima.’

Isebele a ri: ‘U songo vhilaela. Ndi ḓo u wanela yone.’

Isebele a ṅwalela marifhi vhaṅwe vhanna vhahulwane muḓini we uyu munna Nabothe a vha a tshi dzula khawo. A vha vhudza: ‘Wanani vhanna vhavhi vha u amba uri Nabothe o sema Mudzimu na khosi. Zwenezwo ni mu bvisele nnḓa ha muḓi ni mu vhulahe nga matombo.’

Isebele a tshi tou pfa uri Nabothe o fa, a ri kha Ahaba: ‘Zwino tshimbila u yo dzhia tsimu yawe ya nḓirivhe.’ Naa a ni tendi uri Isebele o vha o fanela u ṱarafelwa zwe a ita?

Tshifhinga tshi tshi ḓi ya, Yehova a rumela munna Yehu uri a mu ṱarafe. Musi Isebele a tshi pfa uri Yehu u khou ḓa, a ḓipennda maṱo a lingedza a ḓilugisa uri a nake. Fhedzi musi Yehu a tshi ḓa a tshi vhona Isebele fasitereni, a vhidzelela vhanna vha re pfamoni: ‘Mu poseni fhasi!’ Vhanna vha thetshelesa, samusi ni tshi nga zwi vhona tshifanyisoni. Vha mu posa fhasi a fa. Ha vha hone vhufhelo ha Isebele muvhi.

1 Dzikhosi 16:29-33; 18:1-4; 21:1-16; 2 Dzikhosi 9:30-37.