MWENYE Yelobowamu ali awile, mwenye jwalijose jwakulamulila mu ucimwene wakumpoto wa mitundu 10 ja Ayisalayeli ali jwakusakala. Mwenye Ahabu ali jwakusakala mnope kupundana ni wosopewo. Ana akumanyilila ligongo lyakwe? Ligongo line lili Yesebele, ŵamkwakwe ŵakusakala mnope.

Yesebele nganaŵa jwa Ciyisalayeli. Ali mwanace jwamkongwe jwa mwenye jwa ku Sidoni. Yesebele akusalambila mlungu jwaunami Bala, soni akutendekasya Ahabu ni Ayisalayeli ŵajinji kuti nombe nawo alambileje Bala. Yesebele akusam’ŵenga Yehofa, m’yoyo akuwulaga ŵakulocesya ŵajinji ŵa Yehofa. Ŵane ŵajuŵaga kumbanga kuti akawulaga. Naga Yesebele akusaka cinecakwe, akusakomboleka atamose kuwulaga mundu jwine kuti acipate cinduco.

Lisiku line Mwenye Ahabu akuwoneka jwacanasa mnope. Sambano Yesebele akum’wusya kuti: ‘Ana ligongo cici lelo ali ŵacanasa?’

Ahabu akwanga kuti: ‘Ligongo lya yambecetele Naboti. Nasakaga kusuma mgunda wakwe wa mipeleya. Nambo asalile kuti ngakomboleka kuti uŵe wangu.’

Yesebele akumsalila kuti: ‘Akadandawula. Cingawujigale kuti uwe wawo.’

M’yoyo Yesebele akulemba yikalata yakwawula kwa mayimwene gane gamwanamwana ga mumsinda wakutama Naboti. Akugasalila mwayimwenego kuti: ‘Ŵajigale ŵandu ŵangali mate kuti aŵeceteje kuti Naboti alwesile Mlungu ni Mwenye. Kaneko amkopocesye Naboti kusa kwa msinda nikumponya maganga mpaka awe.’

Yesebele paŵagambile kupikana kuti Naboti awile, akumsalila Ahabu kuti: ‘Sambano ajawule akajigale mgunda wakwe wa mipeleya wula.’ Ana wawojo ngakwiticisya kuti Yesebele akusosekwa cilango ligongo lyakutenda cakusakala mnopeci?

Sambano, pandaŵi jakwe, Yehofa akutumisya mundu jwine lina lyakwe Yehu kukumpa cilango. Yesebele papikene kuti Yehu akwisa, jwalakwe akupakala mawuta, soni akulisalalisya kuti awoneceje jwakusalala mnope. Nambo Yehu pakwika nikum’wona Yesebele paliwindo, akwasalila acalume ŵa m’nyumba ja mwenye kuti: ‘Amponye pasi jwelejo!’ Acalume ŵala akumpikanila Yehu, mpela mwakuyiwonela paciwililici. Akumponya pasi, soni akuwa. Jeleji jili mbesi ja Yesebele, ŵamkwawo mwenye ŵakusakala.