ÓRNI goity Jeroboán, cada toib buñguieeu ni radxiin rony mandary gobierno xtuny chii family xiroʼ de Israel pór buñ mal gocyibu. Buñ ni más mal góc órni buny mandary, ngú Acab. ¿Nanlo xigony la? Ndeʼ gocni scú, portín tzeelbu Jezabel góc toib gonaʼ nigolú mal.

Jezabel diti gócbu buñ israelita. Bixiosbu ngú ni rony mandary gudx Sidón. Láabu riembu dioxh falz Baal, né ronybu que Acab né stipnés israelitas guieen Baal. Jezabel rianladxbu Jehová né ragaitybu xidal buñguieeu ni Dios raquiin par guiniʼ xí gac dzú ni sietra. Stipnésyibu racachlan lainy bileʼ par labúu guilaa. Órni Jezabel noʼ ni rioladxbu, ragaitybu buñ par labúu guicaʼbu ni nainy láabu.

Toibtica dzú Acab noʼbu nabann. Jezabel ranabdiitz láabu: ¿Xigony nóolo nabann dzureʼ?

Por ni Nabot góoch naʼ, racapy Acab. Goniiny naʼ nasiiya xalioobu ro napbu balach, per láabu diti gosaguelbu.

Jezabel raiby láabu: Diti tzólo ló xcalrrasani. Naʼ guiyobi mod par guicaʼlo láani.

Por ngú Jezabel raxel guiich ló tipnés buñxirop ni noʼ ro rabés Nabot. Né ranibu: Colgony que tipnés buñ ni diti noʼ pu raquiin guiniʼ que Nabot goníbu mal de Dios né de buñguieeu ni cayony mandary. Né colcueʼ láabu de gudxcú né colguigasguiee láabu hasta gaitybu.

Órni Jezabel racaʼ cuent que Nabot ma goity, raibybu a Acab: Nigoreʼ goyee cuaʼ xalioobu. Por cós mal ni buny Jezabel, ¿diti raluladxlo que non gac castigar láabu la?

Por ngú, radudy dzú Jehová raxel toib buñguieeu ni laa Jehú par gony castigar Jezabel. Órni Jezabel racaʼ cuent que Jehú ma sieed, ratiébu bisalóbu, rayopybu mod par guiembu toib gonaʼ móz. Per órni Jehú radxiin rabí láabu sobbu roʼ bentan, Jehú raibybu tipnés buñguieeu ni dxee cú: ¡Colguisal láabu layoo! Layibu rasobbu ni ná Jehú, xomod rabilo ló dibuj. Rasalbu Jezabel layoo né Jezabel raity. Modreʼ ranitló Jezabel gonaʼ mal ni buny mandary.