ANƐ o le nimli nɛ nyumuhi nɛ ɔmɛ ji, nɛ o le nɔ́ nɛ a ngɛ pee ɔ lo? A yaa hwu ta, nɛ nihi nɛ nyɛɛ hɛ mi ɔ ngɛ lae. Se eko ɔ, o ma bi ke: ‘Mɛni heje lali ɔmɛ hɛɛ we klaate kɛ akplɔ nɛ a ma kɛ hwu ta a?’ Ha nɛ waa hyɛ.

Yehoshafat ji Israel wɛtso enyɔ ɔ matsɛ. E kɛ Matsɛ Ahab nɛ ji yiti je wɛtso 10 matsɛ kɛ e yo Yezebel hi si ngɛ be kake mi. Yehoshafat ji matsɛ kpakpa kaa e tsɛ Asa. Lɔɔ heje ɔ, woyi je wɛtso enyɔ matsɛ yemi sisi bi ɔmɛ hi si ngɛ tue mi jɔmi mi jehahi babauu.

Se amlɔ nɛ ɔ, nɔ́ ko ba nɛ́ ha mabi ɔmɛ ye gbeye. Tsɔli ba bɔ Yehoshafat amaniɛ ke: ‘Tabuli babauu je Moab, Amon kɛ Seir Yoku ɔ nɔ kɛ ma mo tuami.’ Isrealbi ɔmɛ fuu ya bua a he nya ngɛ Yerusalem konɛ a bi Yehowa dɛ mi yemi kɛ buami. A ya sɔlemi we ɔ, nɛ Yehoshafat sɔle ke: ‘Oo Yehowa wa Mawu, wa li bɔnɛ wa maa pee ha. Wa be nyɛe maa da ta nɛ ɔ nya. Wa ngɛ mo blɔ hyɛe nɛ o ye bua wɔ.’

Yehowa bu Yehoshafat sɔlemi ɔ tue, nɛ e ha e gbalɔ de mabi ɔmɛ ke: ‘Ta a pi nyɛ nɔ́, se Mawu nɔ́. E hia we nɛ nyɛɛ hwu ta. Nyɛɛ lɛɛ nyɛɛ mlɛ, nɛ́ nyɛɛ hyɛ bɔnɛ Yehowa ma he nyɛ yi wami ha.’

E nɔ jena a, Yehoshafat de mabi ɔmɛ ke: ‘Nyɛɛ ngɔ nyɛ he kɛ fɔ Yehowa nɔ!’ Kɛkɛ nɛ e ha lali la Yehowa yi jemi lahi kɛ nyɛɛ tabuli ɔmɛ a hlami. Anɛ o le nɔ́ nɛ ba benɛ e piɛ bɔɔ nɛ a maa su ta nga a nɔ lo? Yehowa ha nɛ henyɛli ɔmɛ kɛ mɛ nitsɛmɛ a he nɔ kunɔ. Nɛ benɛ Isrealbi ɔmɛ ya su lejɛ ɔ, a na kaa tabuli ɔmɛ tsuo gbo kɛ pue si!

Anɛ e pi níle blɔ kaa Yehoshafat ngɔ e he kɛ fɔ Yehowa nɔ lo? Wɔ hu wa maa pee ní leli ke wa ngɔ wa he kɛ fɔ Yehowa nɔ.