BUSHE naubeshiba aba abaume abali pa cikope kabili cinshi balecita? Aba abaume baleya ku bulwi, kabili abaume abali pa ntanshi baleimba. Cinshi abaume abaleimba bashikwatile impanga na mafumo ifya kulwilako? Leka tumone icalengele.

Yehoshafati ali ni mfumu iyaleteka imikowa ibili iya bena Israele. Ali pa calo pa nshita imo ine ne Mfumu Ahabu na Yesebele abaali mu bufumu bwa ku kapinda ka ku kuso umwali imikowa 10. Lelo Yehoshafati ali imfumu iisuma kabili Asa, wishi na o ali imfumu iisuma. E ico pa myaka iingi, abantu abali mu bufumu bwa ku kapinda ka ku kulyo umwali imikowa ibili baleikala bwino.

Lelo kwalicitike icintu cimo icalengele abantu ukuba no mwenso. Abantu baebele Yehoshafati abati: ‘Kuli abantu abengi abafumine ku calo ca Moabu, na ku calo ca Amone, e lyo na ku Lupili lwa Seiri abalefwaya ukumulwisha.’ Abena Israele abengi balilongene mu Yerusalemu ku kulomba ukuti Yehova abafwe. Baile kwi tempele kabili kulya Yehoshafati apepele ati: ‘Mwe Yehova Lesa wesu, tatwishibe ifya kucita. Tatukwete amaka ya kulwisha aba abantu abengi. Tulefwaya ukuti mutwafwe.’

Yehova alyumfwile ipepo, kabili aebele umubomfi wakwe ukweba abantu ati: ‘Inkondo te yenu, ya kwa Lesa. Imwe tamwakalweko. Mukaletamba fye no kumona ifyo Yehova akamupususha.’

E ico ulucelo Yehoshafati aebele abantu ati: ‘Cetekeleni Yehova!’ Lyena abikile bakemba pa ntanshi ya bashilika, kabili ilyo bale-enda, baleyabaleimbila Yehova inyimbo sha kumutasha. Bushe nawishiba icacitike ilyo bali mupepi no kufika ku nkondo? Yehova alengele abalwani ba bena Israele ukutendeka ukwipayana. Ilyo abena Israele bafikile, basangile abalwani babo bonse nabafwa!

Yehoshafati alicitile bwino ukucetekela Yehova, bushe te ifyo? Na ifwe tufwile ukucetekela Yehova.