HI MI hna hi ahotedah an si i zeidah an tuah lengmang lio ti nan hngal maw? Raltuknak ah an kal lio a si i, a hmai bik i mi hna cu hla an sak lengmang lio a si. Sihmanhsehlaw: ‘Zeicah hla satu hna cu raltuknak ah fei le nam an ngeih ve lo?’ tiah nan hal khawh. Zoh hmanh u sih.

Jehoshaphat cu Israel phun-hnih hna pennak i siangpahrang a si. Amah cu chaklei phun 10 hna pennak i Siangpahrang Ahab le Jezebel an chan ah a rak nung ve mi a si. Sihmanhsehlaw Jehoshaphat cu siangpahrang ṭha a si i, a pa Asa zong a ṭha ngai mi siangpahrang pakhat a rak si ve. Cucaah kum tampi chung thlanglei phun-hnih hna pennak chung i mi hna cu lawmhnak he an rak nung kho.

Sihmanhsehlaw mi hna an thin a phanter mi thil zeimaw a rak tlung. Lamkaltu hna nih Jehoshaphat sin ah: ‘Moab, Ammon le Seir Tlang ram hna in ralkapbu nganpi cu nangmah doh awk ah an hung chuak lio,’ tiah an chimh. Israel mi tampi cu Jehovah bawmhnak hal awk ah Jerusalem ah an i pum. Biakinn ah an kal i cuka ahcun Jehoshaphat nih: ‘Maw Jehovah kan Pathian, zei tuah awk kan hngal lo. Hi ralkapbu nganpi hmai ah hin kannih cu bawmtu kan ngei lo. Nangmah lawng kha kan in bochan ko,’ tiah thla a cam.

Jehovah nih a ngaihpiak hna i, a sal pakhat kha a thlah i, mi hna cu hitin a chimhter hna: ‘Hi raldohnak cu nanmah i a si lo, Sihmanhsehlaw Pathian i a si. Nannih nih nan tuk a hau lai lo. Hngak ko u law Jehovah nih zeitindah an khamh hna ti mi tu kha zoh ko u.’

Cucaah a thaizing ah Jehoshaphat nih mi hna cu: ‘Jehovah kha i bochan ko u!’ a ti hna. Cu hnu ah hla satu hna kha a ralkap hna hmai ah a chiah hna i, an kal pah in Jehovah thangṭhatnak hla kha an sak. Raldohnak hmun pawng an phak tik ah zeidah a tlung ti nan hngal maw? Jehovah nih an ral ralkap vialte kha anmah le anmah aa tukter hna i an i that dih. Israel mi hna an rat tik ahcun, an ral ralkap vialte cu an thi dih cang!

Jehoshaphat nih Jehovah aa bochan mi cu a fim a si lo mei? Kannih zong Jehovah kha kan i bochan ve ahcun kan fim ve lai.