¿BE WISI we massergan doamala geb ibu imagnadabmala? Urwedse nadabmala, geb massergan idumamaiddi namagnadabmala. Sun be binsasale: ‘¿Ibigala urwe gala namagnadabmalad dina espadamar semasurmala, geb lanzamar semasurmar bali?’ Anmar daggoena ibigala.

Josafat, Israel reino neggwebur gwabo ganiggidgi reyga mai unni, rey Acab, Jezabelbo reino neggwebur 10 mergu ganiggidgi negdagmamoga. Auggine, Josafatdi rey nuedi, geb e bab Asa nugadi, anba dule nued gusmoga. Degsoggu, birga baa reino neggweburmar gwabo ganiggid nueganbi gudigusmala.

Emisgindi ibmar soggwen gunoniggi, geb a ulale dulemar dobgubuggwa. Gagga berbemaladi Josafatga sognonimala: ‘Urwemalad buggib begi duurmagdanimala, Moab neggwebur ginmaladi, Amón neggwebur, geb Seír yar ginmaladi’. Buggidar Israel dorgan Jerusalénse anbaggunonimala, Jehovás bendagged egisega. Jehováse goled neg siidse nadmarsunna, geb agine Josafat Babse godsa: ‘Jehová, bedi anmar Babdummadi, anmar wissuli igi anmar saer gebe. We buggib urwemalad duurmagdanimalad abinni anmardi geg gue. Be anmar bendagge.’

Jehová iddosa, geb imasa dule wargwen neggweburga sogedi: ‘We urwedi bemargadsuli, Babdummad gadi. Bemardi urwosulid. Unnila bemardi daggoed, geb bemar daggoed igi Jehová bemar bendaggoe’.

Degsoggu, oibosgua wagdaryala Josafat neggweburga soggali: ‘¡Mer Jehová bengumalo!’. Geb urwemalad idu, namagmalad obuggusa, wemardi namagnadabmala Jehová nug odummogedgi. ¿Be wisi igi ibmar gusa urwega owarmagbinmargu? Jehová imasa e sordagan isdarmaladi agga na abinabin urwemalaga. ¡Geb Israel dorgan owarmasmargua, bergwable e isdarmalad burgwar melledidii!

Josafat, Jehová bengussulidba, nue binsaed ibed na oyosa, ¿insoa? Anmar deyob imagmogale, binsaed ibed gumogoe.