¿PÜTÜJAA aaʼu jaralii na wayuukana? ¿Kasa naainjaka? Atkaainjana otta eeʼirajüshii na oʼunakana palajana. ¿Jamüsü nnojotka chajaruuta otta jatü nalüʼüjüin na eeʼirajakana? Wekirajaa sünain tia.

Aluwataashi Jehosafat saaʼu tü piamasükat eʼirukuu. Eejachi nia wanaa sümaa nuluwataain Acab otta Jezabel saaʼu tü poloosükat eʼirukuu. Aluwataai anashi Jehosafat maʼaka naaʼin Asá, chi nüshikai. Anaka sukuwaʼipa tü piamasükat eʼirukuu.

Mmotshii na israeliitakana süka namüin wanee wayuuinnua nümüin Jehosafat: ‹Atkaainjana wamaa na kepiakana Moab, Amón otta Seír›. Outkajaashii na israeliitakana Jerusalén eeka tü aʼwaajüleekat süpüla nachuntuin nümüin Jeʼwaa, nümaka Jehosafat: ‹Pükaaliinja waya Jeʼwaa, nnojotsü watüjaain aaʼu tü waainjüinjatkat. Isasü wachiki watkaain namaa na surulaatkana›.

Nümaka Jeʼwaa nükajee wanee wayuu: ‹Nnojoishii atkaainjanain jia, chi atkaainjachikai nia Maleiwa. Jiʼrüinjatü neʼe tü naainjakat süpüla nükaaliinjüin jia›.

Nümaka Jehosafat waneemüin kaʼi namüin na israeliitakana: ‹¡Jiʼitaa jaaʼin nünain Jeʼwaa!› Niʼitaaka wayuu eeʼirajüshii napüleerua na surulaatkana. Oʼunushii naya sümaa neeʼirajüin nümüin Jeʼwaa. ¿Pütüjaa aaʼu kasa alataka nalüʼütpa süpüla atkawaa? Nütkeʼerüin Jeʼwaa na naʼünüükana. ¡Nantapa na israeliitakana ouktushii napüshuaʼa na naʼünüükana!

Kekiishi maʼin Jehosafat süka niʼitaain naaʼin nünain Maleiwa. Washatüle nukuwaʼipa kekiijeena maʼin waya.