INAI tatau bona idia karaia noho karana oi diba, a? Idia be tuari totona idia lao, bona vairanai idia raka taudia be ane idia abia noho. To reana oi henanadai: ‘Dahaka dainai ane abia taudia be tuari kaia bona io idia abia lasi?’ Mani ita itaia.

Iehosapata be Israela ena iduhu rua basileiana ena king. Ia be not kahana ena iduhu 10 basileia ena King Ahaba bona Iesebele edia negai ia noho. To Iehosapata be king namona, bona ena tamana Asa danu be king namona. Unai dainai lagani momo lalonai saut kahana ena iduhu rua basileiana be mauri namona idia moalelaia.

To hari gau ta ia vara dainai taunimanima idia gari. Gwaukau taudia be Iehosapata dekenai idia gwau: ‘Moaba, Amono bona Seiri Ororo taudia edia tuari orea badana ta ia mai noho oi idia tuari henia totona.’ Israela taudia momo be Ierusalema dekenai idia haboua Iehova ena heduru idia tahua totona. Dubu dekenai idia lao, bona unuseniai Iehosapata ia guriguri: ‘Iehova emai Dirava e, ai diba lasi dahaka do ai karaia. Inai tuari orea badana vairanai ai be goada lasi. Mani ai oi durua.’

Iehova ia kamonai, bona ena hesiai tauna ta amo taunimanima ia hamaoroa: ‘Tuari be umui emui lasi, to Dirava ena. Do umui tuari lasi. Itaia sibona, bona Iehova ese umui do ia hamauria dalana do umui diba.’

Unai dainai, murina dinana ai Iehosapata ese taunimanima ia hamaoroa: ‘Iehova umui abidadama henia!’ Bena ane abia taudia be ena tuari taudia vairanai ia atodia, bona idia raka noho lalonai Iehova hanamoa anedia idia abia. Tuari gabuna kahirakahira idia lao neganai ia vara gauna oi diba, a? Iehova ena siahu dainai edia inai taudia be sibodia idia tuari heheni. Bona Israela taudia idia ginidae neganai, ibounai idia mase vadaeni!

Iehosapata be Iehova ia abidadama henia dainai ia aonega, ani? Ita danu do ita aonega bema Iehova ita abidadama henia.