Yahucafat yeṭṭef di Yahwa
TAQSIṬ TIS 67
Yahucafat yeṭṭef di Yahwa
TEẒRIḌ anwa-ten yergazen-agi? Acu akka i xeddmen? Atnan leḥḥun ɣer lgirra. Lameɛna ahat teqqareḍ-as: ‘Acuɣer iɣennayen-agi yezwaren zdat n lɛeskeṛ ur sɛin ara lessyuf d imeẓragen swayes ara mceččawen?’ D ayen ara nwali tura.
Yahucafat yeḥkem ɣef tgelda n sin leɛṛac n Isṛayil. Iɛac di zzman ugellid Aḥab akk-d Izabal i gḥekmen di sin ɣef tgelda n umalu yesɛan ɛecṛa leɛṛac. Lameɛna, Yahucafat neţţa yella d agellid yelhan am baba-s iwumi qqaren Asa. Ɣef waya i gɛac aṭas n iseggasen di sseɛd wegdud n tgelda n usammer yesɛan sin leɛṛac.
Lameɛna yiwen wass, teḍra yiwet n lḥaǧa issagden agdud. Wwḍen-d yemceggɛen, nnan i Yahucafat: ‘D izumal n iɛsekṛiwen i d-iteddun si tmura n Muwab, Ɛamun akk-d wedrar n Siɛir akken ad ẓedmen fell-ak.’ Ihi, At Isṛayil nnejmaɛen deg waṭas yid-sen di Yarucalim iwakken ad ɛennin ɣer Yahwa. Ṛuḥen ɣer lemqam, dɣa Yahucafat yeẓẓull dinna: ‘A Yahwa Ṛebbi, ur neẓri ara d acu ara nexdem. Aql-aɣ netḥeyyeṛ zdat n izumal-agi n iɛsekṛiwen. Allen-nneɣ deg-k i reṣṣant.’
Yahwa iḥess-ed, dɣa idemmer yiwen seg iqeddacen-is ad yini i wegdud: ‘Amenɣi-yagi mačči d ayla-nwen, d ayla n Ṛebbi. Mačči d kunwi ara yennaɣen di lfetna-yagi. Muqlet kan, twalim leslak ara wen-d-yawi Yahwa.’
Azekka-nni, Yahucafat yenna i wegdud: ‘Ṭṭfet di Yahwa!’ Dɣa yezwar iɣennayen ileḥḥun ţḥemmiden Yahwa zdat n lɛeskeṛ. Teẓriḍ acu i geḍran mi qrib ad awḍen ɣer wemkan umenɣi? Yahwa yesnaɣ ixṣimen-nsen wway gar-asen. Mi leḥqen wat Isṛayil, ufan iɛdawen-nni meṛṛa mmuten!
Mačči d aɛeqli i gella Yahucafat m’akka yeţkel ɣef Yahwa? D iɛeqliyen ara nili ula d nukni ma neţkel fell-as.
1 Igelliden 22:41-53; 2 Amezruy 20:1-30.