ANIHEBʼ li winq li wankebʼ saʼ li eetalil ut kʼaru yookebʼ xbʼaanunkil? Ebʼ li winq aʼin yookebʼ chi bʼichank ut xikebʼ re chi yalok. Qilaq, kʼaʼut naq maakʼaʼebʼ xchʼiichʼ ut xjutzʼ cheʼ?

Laj Jehosafat aʼan li awabʼej re li xteep laj Benjamin ut laj Juda. Laj Jehosafat kiwank saʼ xkutankil naq laj Acab ut li xJezabel yookebʼ xjolominkil li 10 chi teep re Israel. Laj Jehosafat chaabʼil awabʼej. Joʼkan ajwiʼ laj Asa, li xyuwaʼ laj Jehosafat, chaabʼil naq kiwank chaq. Joʼkan naq chiru naabʼal chihabʼ ebʼ li wiibʼ chi teep sahebʼ chaq saʼ xchʼool.

Ebʼ laj Israel yookebʼ xxiw. Xbʼaan naq wiibʼ oxibʼ chi winq keʼxye re laj Jehosafat: ‹Naabʼalebʼ laj Moab, laj Amon ut ebʼ laj Seir teʼchalq chi yalok saʼ aabʼeen›. Joʼkan naq naabʼalebʼ laj Israel keʼxchʼutubʼ ribʼ saʼ li tenamit Jerusalen saʼ Rochoch li Yos re naq li Jehobʼa ttenqʼanq rehebʼ. Aran kitijok laj Jehosafat: ‹Jehobʼa, at inYos, inkʼaʼ naqanaw kʼaru tqabʼaanu. Naabʼalebʼ laj puubʼ chalkebʼ re saʼ qabʼeen. Chooʼaatenqʼa, bʼaanu usilal!›

Li Jehobʼa kirabʼi li xtij laj Jehosafat, joʼkan naq kixtaqla jun rehebʼ laj kʼanjel chiru re naq tixye re li tenamit: ‹Li yalok aʼin re li Yos ut maawaʼ eere. Moko laaʼex ta texyaloq. Teeril chanru texkol li Jehobʼa›.

Naq kisaqewk, laj Jehosafat kixye re li tenamit: ‹Kʼojobʼamaq eechʼool rikʼin li Jehobʼa›. Tojaʼ naq kixkʼehebʼ laj bʼich chiruhebʼ laj puubʼ. Naq yookebʼ chi xik saʼ li yalok, yookebʼ ajwiʼ chi bʼichank chiru li Jehobʼa. Ma nakaanaw kʼaru kikʼulmank naq ebʼ laj Israel wulakebʼ re saʼ li naʼaj bʼarwiʼ teʼyaloq? Li Jehobʼa kixbʼaanu naq ebʼ laj puubʼ, li xikʼ nekeʼilok rehebʼ, teʼyaloq chiribʼilebʼ ribʼ. Naq keʼwulak, keʼxtaw ebʼ laj puubʼ chi kamenaq.

Laj Jehosafat wank xnaʼlebʼ, joʼkan naq kixkʼojobʼ xchʼool rikʼin li Yos. Wi tqakʼojobʼ qachʼool rikʼin li Jehobʼa tqakʼutbʼesi ajwiʼ naq wank qanaʼlebʼ.