KANI ungabesiba aba balalume ne fibalukucita? Balukuya ku nkondo, kabili abalalume bali kuntangile balukwimba. Pano ungepusya ati: ‘Pano nindo abalukwimba tabakwatile impoko ne mifwi ifya kulwilako?’ Ngatubone.

Jeosafati ni mfumu ya pa bufumu ubwa fikoto fyobilo ifya mu Isilaeli. Aliko pa mpindi ili Imfumu Eyabi na Jesebeli balukuteka pa bufumu ubwa fikoto 10. Pano Jeosafati ni mfumu iiweme, kabili ba Asa bawisi baali ni mfumu iiweme. Popele pa myaka iingi abantu abali mu bufumu bwa fikoto fyobilo balikele bwino.

Pano icintu cacitika icalenga abantu ukutiina. Bakapaso basimikila Jeosafati ati: ‘Palukumwisileni ibumba lya fita ilikulu ilya kufuma ku fyalo fya Moabi, Amono ne bantu ba ku Lupili lwa Seyili.’ AbaIsilaeli abengi babungana mu Jelusalemi mu kufwaisya ukofwa kwa baYehoba. Baya kwi tempuli, kabili kulya Jeosafati atembela ati: ‘Mama mwe baYehoba, baLesa wesu, tatwisi ifitungacita. Pakuti tatukwete amakosa akulwa ne bumbe’li likulu ilya fita ililukutwisila. Sombi amenso esu alilolele kuli mwebo ku kutofwa.’

BaYehoba bakutika, kabili baYehoba baeba umo pa bapyungisi babo ukubula abantu ati: ‘Inkondo taili yenu, sombi ya baLesa. Tacikafwaikwapo kuli mwebo ukulwa muli yiyi. Mwimakane lukoso, ne kubona ukupulusya kwa baYehoba ukwa kuli mwebo.’

Ulucelo lwakonkapo Jeosafati abula abantu ati: ‘Mupememo muli baYehoba!’ Kabili abika abakwimba kuntangile ya fita, pa kwenda’bo eli babembila baYehoba isya kubatemyasya. Kani waisiba icacitika ili bapalamina ku kulwa? BaYehoba balenga ifita ifilwani ukutatika ukulwa benka abene nabene. Ili abaIsilaeli bafika, basangana ifita ifilwani fyafwa fyonse!

Mba kani Jeosafati tali ne kalango mu kucetekela baYehoba? Koti twaba ne mano kani nafwebo twacetekela muli bo.

1 Imfumu 22:41-53; 2 Ifyebo 20:1-30.