MPANJI 67

Yehoshafwati Namukuhweleli Yehova

WUNAYILUKI awantu niyuma yinakwilawu? Anakuya kunjita, nawa ana amayala adi kumbidi anakwimba. Ilaña wunateli kwihula neyi: ‘Muloña wankahi añimbi chanabuliliwu kusenda mpoku jatubali nimayoña akulwa nachu?’ Tutalenu ntahi.

Yehoshafwati diyi mwanta wawanta wanyitaña yiyedi yamuIsarela. Washakamaña mumpinji yoyimu naMwanta Ahabi niYezebeli amuwanta wanyitaña 10 wakukabeta kaluwunda. Ilaña Yehoshafwati himwanta wamuwahi, nitata yindi Asa niyena wadiña mwanta wamuwahi. Dichi hadi yaaka yayivulu antu akunyitaña yiyedi yawanta wakukabeta kambwela ashakamini chihandilu chachiwahi.

Ilaña hikukumwekana chuma chimu chatiyishili antu woma. Antemesha hiyakumuleja Yehoshafwati nawu: ‘Amashidika amavulu akwituña daMowabi, niAmoni nikuMpidi yaSeyiri anakwinza nakukulukuka.’ A Isarela amavulu hiyakupompa kuYerusalema nakukeñakeña wukwashu waYehova. Hiyakuya kutembeli, kwenakuna Yehoshafwati hakulomba nindi: ‘Eyi Yehova Nzambi yetu, hituneluki chakwilaku. Hitukweti wakutukwasha hadawa amashidika amavuluku. Tunakutala kudeyi wutukwashi.’

Yehova hakutiya nawa hakuleja wumu hadi ambuñidi kuleja antu nindi: ‘Njita hiyenuku, ilaña yaNzambi. Enu himwakalwaku. Kuminenu dakutala mumoni chakayipulwishayi Yehova.’

Kwifuku dekwawu nantetemena Yehoshafwati hakuleja antu nindi: ‘Mukuhwelelenu Yehova!’ Dichi hakusha añimbi kumbidi yamashidika indi, hiyakwenda iku anakwimba nakumuhameka Yehova. Wuneluki chinazatiki chanashikiwu kwakwihi nanjita? Yehova hakwilisha amashidika awayilumbu kulwa awenawu. Chanashikiwu aIsarela, ayikuwana ayilumbu jawu ejima anafwi!

Komana Yehoshafwati hadiña namaana hakumukuhwelela Yehovaku? Ninetu tukwikala namaana neyi tukumukuhwelela Yehova.

1 Anyanta 22:41-53; 2 Kushindulula 20:1-30.