KUA kite koe e koai teia au tangata e eaa ta ratou e rave ra? Te aere ra ratou ki te tamaki, e te imene ra te au tangata i mua. Penei ka ui koe e: ‘Eaa ra i kore ei a teia aronga imene koke e te korare ei tamaki?’ Ka akara ana ra tatou.

Ko Iehosaphata te ariki o te patireia o nga kopu e rua o Iseraela. I ora ana aia i te taime o te Ariki ko Ahaba e Iezebela o te patireia apatokerau o te 10 kopu. Inara e ariki meitaki a Iehosaphata, e tona papa ko Asa e ariki meitaki katoa. No reira, no te au mataiti kua mataora ua te oraanga o te iti tangata o te patireia apatonga o nga kopu e rua.

I teianei ra kua tupu tetai apinga tei tamataku i te tangata. Kua ripoti mai te aronga kave karere kia Iehosaphata e: ‘E nuku vaeau maata no te au enua o Moabi, o Amona e te Maunga Seira te aere maira i te tamaki ia koe.’ Kua akaputuputu mai te au Iseraela e manganui ki Ierusalema i te kimi tauturu mei ia Iehova. Kua aere ratou ki ko i te iero, e i reira kua pure a Iehosaphata e: ‘E to matou Atua e Iehova e, kare matou i kite e eaa ta matou ka rave. Kare e rauka ia matou i te tamaki atu i teia nuku vaeau maatamaata. Te akara atu nei matou kia koe no te tauturu.’

Kua akarongo mai a Iehova, e kua tono i tetai o tona au tavini kia akakite ki te tangata e: ‘Kare na kotou teia tamaki, na te Atua ra. Kare kotou e anoanoia kia tamaki. Tu ua ana ra, e akara i te akaora anga a Iehova ia kotou.’

No reira i tera mai popongi kua akakite a Iehosaphata ki te tangata e: ‘E irinaki ia Iehova!’ Kua tuku i reira aia i te aronga imene ki mua ake i tona au vaeau, e ia ratou e mati ra kua imene akapaapaa ratou ia Iehova. Kua kite koe e eaa tei tupu i te vaitata anga atu ratou ki te tamaki? Kua akakeu a Iehova i te au vaeau enemi kia ta ia ratou uaorai. E i te tae anga atu to Iseraela, kua mate te au vaeau ravarai!

Kare ainei to Iehosaphata i te tu pakari i te irinaki ia Iehova? Ka pakari katoa tatou me irinaki tatou Iaia.