LÁ NATAYÁÁ tsíin nindxu̱ún xa̱bekha bugi̱ ga̱jma̱a̱ ndiéjunʼ rí eni̱ xá. Nagún guxnamijná, ga̱jma̱a̱ xa̱bekha bi̱ kuwa ragún ginuu kuwa runi ajmúú. Mbáa natraximínáʼ: ‹Náa numuu rí xa̱bu̱ bi̱ kuwa runi ajmúú na̱nguá ku̱ya̱ kúdú ga̱jma̱a̱ chídí rí muxnamijná ga̱jma̱a̱ rá.› Mbuʼyáá náa numuu.

Josafat ñajunʼ rey náa reino ndrígóo a̱jma̱ xuajin ma̱jkhaʼ dí rígá náa Israel. Mbríguu tsiguʼ nixtáa Josafat índo rey Acab nixtáa ga̱jma̱a̱ Jezabel náa reino ndrígóo 10 xuajin ma̱jkha̱ʼ rí naguanúu xígií náa norte. Mú Josafat ñajunʼ mbáa rey májánʼ, ga̱jma̱a̱ Josafat nigiʼdaa anu̱u̱ bi̱ nigumbiʼyuu Asa ma̱ngaa ninindxu̱u̱ májánʼ xa̱bu̱. Ikha jngó mba̱yu̱ʼ tsiguʼ xa̱bu̱ bi̱ kuwa náa reino ndrígóo a̱jma̱ xuajin ma̱jkha̱ʼ rí naguanúu xígií náa sur nakúwa májánʼ wéñuʼ.

Mú xúgi̱ narígá mbá rí naʼni mamiñún xa̱bu̱. Tikhun xa̱bu̱ bi̱ ku̱ya̱ ajngáa nutháán Josafat: ‹Naguwáʼ mbaʼin wéñuʼ soldados bi̱ nandún muxnamijná ga̱jma̱á ni̱ndxa̱ʼ, ikhiin naguwáʼ náa xuajin Moab, Amón ga̱jma̱a̱ náa kúbá Seír›. Mbaʼin israelitas nagimbúun náa Jerusalén mu Jeobá mambáñún. Ikhiin nagún náa templo, ga̱jma̱a̱ ikhí Josafat naʼtájkháan: ‹Jeobá Dios ndrígúxu̱, ikháanʼ tséyaa rí gúnixu. Xáʼnguxuʼ guxnamíjna gajmiúxu soldados bi̱ mbaʼin wéñuʼ. Atambáyuxu ikháánʼ›.

Jeobá naʼdxun, ga̱jma̱a̱ naʼni rí mbáa xa̱bu̱ ndrígóo maʼthúu̱n xuajñu: ‹Raʼkháa ikháanʼ kaʼyalá rí muxnamíjna, Dios kaʼyoo rígi̱. Xáʼyóoʼ muxnamíjna. Guʼgíiʼ edxala ga̱jma̱a̱ gu̱ya̱a̱ xú káʼnii Jeobá gáʼni káwaanʼ›.

Ikha jngó i̱mba̱ néjtsuu miʼcha̱ Josafat naʼthúún xa̱bu̱: ‹¡Gakumala kuya̱a̱ Jeobá!›. Ikhú naʼni rí magun xa̱bu̱ bi̱ nuni̱ ajmúú náa inún soldados, ga̱jma̱a̱ índo̱ xa̱bu̱ bugi̱ kuwa ragún nuni̱ ajmúú náa Jeobá. Lá natayáá dí erígá índo̱ naguanu náa muxnamijná ráʼ. Jeobá naʼni rí xa̱bu̱ bi̱ sia̱nʼ gajmiún muxnamijná ka̱nikhiin. ¡Índo̱ israelitas naguanu ikhí, xúgínʼ soldados bi̱ gajmiún sia̱nʼ nikháñun!

Índo̱ Jeosafat nikumu̱u̱ kaʼyoo Dios nisngájma rí nigiʼdoo wéñuʼ edxu̱u̱, lá ragájkhun rí á mu xúʼko̱ má eʼni mangáanʼ manindxalú xa̱bu̱ bi̱ gíʼdoo wéñuʼ edxu̱u̱ ráʼ.