Makani 67: Josafati Usyoma Jehova
HENA ulibazyi basankwa aaba, alimwi ino ncinzi ncobacita? Baunka kunkondo, alimwi basankwa ibali kumpela balaimba. Pele ulakonzya kubuzya kuti: ‘Nkaambo nzi baimbi ncobatajisi zipeni amasumo aakulwanya?’ Atubone.
Josafati mwami wamisyobo yobilo yabana Isilayeli. Ulapona aciindi nceena cipona Ahabu a Jezebeli Bami babwami bwamisyobo iili 10 bwakunyika. Pele Josafati mwami mubotu moyo alimwi abalo bausyi bakali babotu moyo. Aboobo kwamyaka minji, bantu babwami bwamusyobo yobilo bwakumusanza bazumanana kupona buumi buli kabotu.
Pele lino kwacitika cimwi cintu capa kuti bantu bayoowe. Basikutumwa baambila Josafati kuti: ‘Nkamu yabasikalumamba mpati bazwa mucisi cabana Mowabu, Amoni a Cilundu ca Seili balaboola kukulwana.’ Bana Isilayeli banji babungana ku Jelusalemu kulomba lugwasyo kuli Jehova. Baunka kutempele, alimwi okuya Josafati wapaila wati: ‘O Jehova Leza wesu, tatuzyi ncotweelede kucita. Tatuko nguzu zyakulwana nkamu eeyi yabasikalumamba mpati. Nduwe ngotusyoma kutugwasya.’
Jehova wamvwa, eelyo waambila umwi wababelesi bakwe kwaambila bantu kuti: ‘Nkondo taili yanu pe, pele njiya Leza. Tamukayandiki kulwana. Kamwiile kulangilila buyo mubone Jehova mbwalaamufwutule.’
Aboobo buce mafwumofwumo, Josafati waambila bantu kuti: ‘Amusyome muli Jehova!’ Kumane wabikka baimbi kumpela lyabasikalumamba bakwe, nobeenda, baya ciimba ntembauzyo kuli Jehova. Hena ulicizyi cacitika nibasika aafwiifwi awaawo aalwaninwa? Jehova wapa kuti basinkondonyina batalike kulwana muli cabo-cabo. Basike bana Isilayeli, bajana basinkondonyina boonse bafwa.
Hena Josafati tanaakacita cabusongo kusyoma muli Jehova? Tuya kucita cabusongo ikuti andiswe katusyoma Muli nguwe.
1 Bami 22:41-53; 2 Makani 20:1-30.
Mibuzyo
- Ngwani Josafati, alimwi wakapona ciindi nzi?
- Nkaambo nzi bana Isilayeli baliyoowede, alimwi ncinzi bunji bwabo ncobacita?
- Mbwiinguzi nzi Jehova mbwaaingula kumupailo wa Josafati?
- Ncinzi Jehova ncaapa kuti cicitike nkondo kaitanatalika?
- Nciiyo nzi ncotukonzya kwiiya kuli Josafati?
Mibuzyo aimwi
- Bala 2 Makani 20:1-30.
Ncinzi Josafati ncaakatondezya babelesi basyomeka ba Leza ncobeelede kucita ikuti banjila mubukkale bukatazyide? (2 Mak. 20:12; Int. 25:15; 62:1)
Mbwaanga lyoonse Jehova walikubelesya nzila yakwaambaula mukweendelezya bantu bakwe, ino ninzila nzi sunu njabelesya? (2 Mak. 20:14, 15; Mt. 24:45-47; Joh. 15:15)
Leza aakubusya “nkondo yabuzuba bupati bwa-Leza Singuzuzyoonse,” mbuti bukkale bwesu mbobuya kuba mbuli bwa Josafati? (2 Mak. 20:15, 17; 32:8; Ciy. 16:14, 16)
Ikwiinda mukwiiya bana Levi, ino bapainiya abamisyinali bajisi lubazu nzi sunu mukutola ampela mulimo wakukambauka nyika yoonse? (2 Mak. 20:19; Balo. 10:13-15; 2 Timo. 4:2)
