HISITOLIA 67
ʼE Falala Ia Sosafate Kia Sehova
ʼE KOUTOU ʼiloʼi pe ko ai te ʼu tagata ʼaenī, pea koteā te meʼa ʼaē ʼe nātou fai? ʼE nātou ʼolo ki te tau, pea ʼe hiva te ʼu tagata ʼaē ʼe haʼele ʼi muʼa. Kae ʼe lagi koutou ʼui anai: ‘He koʼe ʼe mole ʼi ai he ʼu heletā pea mo he ʼu tao ʼa te ʼu tagata hiva?’ Tou vakaʼi te faʼahi ʼaia.
Neʼe hau ia Sosafate ki te ʼu telepi e lua ʼo Iselaele. Neʼe maʼuli ia ʼi te temi tonu ʼo te Hau ko Akape pea mo Sesapele, te hau ʼo te ʼu telepi e hogofulu ʼo te potu tokelau. Kae ko Sosafate neʼe ko te hau agalelei, pea ko tana tāmai te hau ko Asa neʼe toe agalelei foki mo ia. Koia lolotoga ni ʼu taʼu loaloaga neʼe maʼuli fiafia te hahaʼi ʼo te ʼu telepi e lua ʼo te potu toga.
Kae neʼe hoko te meʼa neʼe matataku ai te hahaʼi. Neʼe fakahā e te ʼu tagata ʼave logo kia Sosafate: ‘ ʼE ʼōmai te toe kautau kaugamālie ʼaupito mai te ʼu fenua ʼo Moape, ʼo Amoni, pea mo te Moʼuga ko Seile ʼo tauʼi koutou.’ Ko te tokolahi ʼo te kau Iselaelite neʼe nātou fakatahitahi ki Selusalemi ʼo kumi tokoni kia Sehova. Neʼe nātou ʼolo ki te fale lotu, pea neʼe faikole fēnei ia Sosafate: ‘Ê Sehova tomatou ʼAtua, ʼe mole mātou ʼiloʼi pe koteā te meʼa ʼaē ʼe tonu ke mātou fai. ʼE mole homatou mālohi ki te toe kautau kaugamālie ʼaupito ʼaia. ʼE mātou kole atu ke ke tokoni mai kia mātou.’
Neʼe logoʼi e Sehova tanatou pāui, pea neʼe ina ʼui age ki tana tagata kaugana ke ina ʼui fēnei ki te hahaʼi: ‘ ʼE mole ʼa koutou te tau, kae ʼe ko te tau ʼa te ʼAtua. ʼE mole koutou tau anai. ʼE koutou sisio anai, pea ʼe koutou sio anai peʼe hāofaki feafeaʼi koutou e Sehova.’
Koia ʼi te uhu ake neʼe ʼui e Sosafate ki te hahaʼi: ‘Koutou falala kia Sehova!’ Pea neʼe ina fakaʼatu ki muʼa te ʼu tagata hiva ʼi tana kautau, pea lolotoga tanatou haʼele neʼe nātou hiva fakavikiviki kia Sehova. ʼE koutou ʼiloʼi pe koteā te meʼa ʼaē neʼe hoko ʼi tanatou fakaōvi atu ki te potu ʼaē ka hoko ai te tau? Neʼe fakatupu e Sehova te maveuveu ʼi tonatou ʼu fili, pea neʼe nātou fetauʼaki. Pea ʼi te kaku atu ʼa te kau Iselaelite, neʼe kua mamate fuli tonatou ʼu fili!
Neʼe mole agapoto koa la ia Sosafate ʼi tana falala ʼaē kia Sehova? Koia ʼe tou agapoto anai mo kapau ʼe tou falala mo tatou kia te Ia.