ANA akwamanyilila ŵanduŵa, soni ana akumanyilila yakutenda pelepa? Akwawula kungondo, acalume ŵali pasogolowo akwimba. Nambo mwine komboleka kusimonga kuti: ‘Ana ligongo cici ŵakwimbawo nganakola maupanga ni mapanga gakuputila ngondo?’ Kwende tulole.

Yehosafati ali mwenye jwa ucimwene wa mitundu jiŵili ja Ayisalayeli. Jwalakwe akwete umi mundaŵi ja Mwenye Ahabu ni Yesebele ŵa mu ucimwene wakumpoto wa mitundu 10. Nambo Yehosafati ali mwenye jwambone, soni baba ŵakwe Asa ŵalijisoni mwenye jwambone. M’yoyo kwa yaka yejinji ŵandu ŵa mu ucimwene wakummwela wa mitundu jiŵili akusangalala ni umi.

Nambo sambano cindu cine cikwatendekasya ŵandu ndetemu. Ŵamtenga akusala kwa Yehosafati kuti: ‘Likuga lyekulungwa lya asilikali ŵakutyocela ku Moabu, Aminoni, soni ku Litumbi lya Seili akwisa kuti amenyane nawo ngondo wawojo.’ Ayisalayeli ŵajinji akusongangana ku Yelusalemu kukuŵenda kuti Mlungu ŵakamucisye. Akwawula ku Nyumba ja Mlungu, kweleko Yehosafati akupopela, acitiji: ‘O Yehofa Mlungu jwetu, ngatukumanyilila yampaka tutende. Nganitukola macili gakulimbana ni likuga lyekulungwa lya asilikalili. Tukwaŵenda kuti atukamucisye.’

Yehofa akupikanila lipopelo lila, m’yoyo akumsalila jwakutumicila jwakwe jwine kuti ŵasalile ŵandu kuti: ‘Ngondo ngaŵa jawo, nambo ja Mlungu. Jemanja ngamkusosekwa kuputa ngondo. Agambe kuŵa mesope, kuti alole mwaciŵakulupucisye Yehofa.’

Sambano kundaŵi kwakuyicisya Yehosafati akwasalila ŵandu kuti: ‘Amkulupilile Yehofa!’ Kaneko Yehosafati akujigala ŵakwimba nikwaŵika kusogolo kwa asilikali ŵakwe, m’yoyo pakwenda pakwawula kungondo akwimba nyimbo syakulumba Yehofa. Ana akumanyilila yayikutendekwa pakuŵandicila kumalo gangondo? Yehofa akutendekasya asilikali ŵa acimmagongo ŵala kuputana jika. Sambano Ayisalayeli pakukopocela kumalo kula, akusimana kuti asilikali wosope ŵa acimmagongo ŵala awile!

Ana Yehosafati nganatenda yindu mwalunda pakulupilila Yehofa? M’wejisoni naga tukulupilila Yehofa, tuciŵa ŵalunda.