¿JIWASIN jaktanxasma ukhax mamamax kamachaspasa? ¡Wal kusisispaxa! Ukat ¿jiwatanakax jaktapxaspati? ¿Nayrax jaktapxirïpachänti?

Mä tatampi mä mamampi mä waynitumpiw akankaski. Tatax Elías sat profetawa. Mamax Sareptankir viuda warmiwa, uka waynitux wawapawa. Mä urux uka wawaw usuntäna. Wal usuntasin jiwxänwa. Ukatwa Eliasax ‘wawam churita’ sänxa.

Eliasax altusaruw ichkatasiwayäna, ukat ikiñaruw uchäna. Ukat akham mayisïna: ‘Jehová Dios tata, aka wawa jaktayakmaya’ sasa. ¡Ukat wawax samaqxänwa! Eliasax ichuqanisaw mamapar akham säna: ‘¡Uñjma, wawamax jaktxiwa!’ sasa. Ukat mamapax wal kusisïna.

Jehová Diosan yaqha profetapax Eliseo satänwa, Eliasan yanapiripänwa. Ukat Eliseox milagronakxa lurarakikïnwa. Mä uruxa Sunem sat markaruw saräna ukat mä mamaw jupar sum katuqtʼäna. Uka qhipatxa uka mamax mä wawanïnwa.

Mä alwaxa, kunapachatï wawax jachʼäxän ukhaxa, tatapax pampan irnaqaskäna ukaruw saräna. Ukat mayak akham sas wararxäna: ‘¡Ay pʼiqi! ¡Pʼiqiw usutu!’ sasa. Kunapachatï utar puriyapxäna ukhaxa jiwxänwa. ¡Wal mamapax jachpachäna! Ukat ukaratpachaw Eliseo thaqhiri saräna.

Eliseox purinïna ukhaxa, uta manqharuw jiwat wawa ichtʼat mantäna. Jehová Diosaruw mayisïna, ukat jiwataruw winkxatäna. Uka wawasti jukʼat jukʼat juntʼutatasin paqallq kutiw jachʼirasïna. ¡Mamapax utar mantasax wawapar jakaskir uñjasinxa wal kusisïnxa!

Walja jaqinakaw jiwarxi. Ukat familiaranakapasa munat masinakapasa wali llakitaw sarnaqapxi. Jiwasanakax janiw jiwatanak jaktayksnati. Jehová Diosaw niyas jaktayaspaxa. Ukat mayanwa yatxataskañäni kunjamsa Jehová Diosax millón millón jiwatanakar jaktayani ukxa.