?SƐ amun wu naan amun cɛn’n, amun nin’n i wun’n yó i sɛ? ?Nán i wun cɛ yɛ ɔ́ blíblí i ɔ? ?Sanngɛ yoo, sɛ sran kun wu’n, ɔ́ kwlá sɛ́ i sin nguan nun ekun? ?I sɔ sa’n w’a yo le?

Amun nian bian nin bla nin gbanflɛn kan nga. Ɲanmiɛn i nuan ijɔfuɛ Eli yɛle bian sɔ’n. Bla’n fin Sarɛpta. Angbeti bla ɔ, kpɛkun i wa yɛle gbanflɛn kan’n. Le kun’n, be o lɛ kpɛkun ba’n i wunnɛn w’a yo i ya. I wunnɛn ya sɔ’n w’a yoman blɛblɛ, ɔ maan ɔ fa yoli i wie. Eli seli bla’n kɛ: ‘Fa ba’n man min.’

Eli fali ba i fuɛn’n fuli nglo sua’n nun lɔ, yɛ ɔ fɛ i lali i bɔbɔ i bɛ’n su. Ɔ srɛli Ɲanmiɛn kɛ: ‘Eee Zoova yo maan ba’n ɲan nguan ekun.’ Kpɛkun ba’n sɛli i sin ɲannin nguan ekun! Yɛ Eli fali ba’n nglo lɔ jrali ngua lɛ kpɛkun ɔ seli bla’n kɛ: ‘Nian ɔ wa’n, i ɲin o su!’ Like nga ti yɛ bla’n i klun jɔ dan’n, yɛ o lɛ.

Ɲanmiɛn i nuan ijɔfuɛ dan’n kun ekun yɛle Elize. Ɔ ti Eli i ukafuɛ. Sanngɛ blɛ wie nun’n, Zoova maan Elize yili atrɛ wie mun. Cɛn kun Elize sin ɔli Sinɛmu. Klɔ sɔ’n su bla kun yoli i ye. I sin’n, bla’n wuli ba yasua kun.

Kɛ ba’n ɲinnin’n, le kun nglɛmun ɔ ko toli i si’n m’ɔ di junman’n fie su lɔ’n. Be o lɛ o, kpɛkun ba’n w’a kpan kɛ: ‘Min ti o! Min ti’n yo min ya!’ Kɛ be fɛ i bali awlo’n, kpɛkun ba’n w’a wu. I nin’n i wla boli i wun dan. Bla’n ka lɛ ɔli Elize sin.

Kɛ Elize juli lɛ’n, ɔ fali ba’n i fuɛn’n wluli sua ba’n nun lɔ. Ɔ srɛli Zoova kpɛkun ɔ lali ba’n su. Kɛ ɔ́ cɛ́ kan’n, ba’n i wunnɛn’n loli fɛfɛfɛ, kpɛkun ɔ kpɛli bɛ kpɛ nso. Kɛ bla’n bali m’ɔ wunnin kɛ i wa’n i ɲin o su’n, nanwlɛ, i fɛ m’ɔ yoli i’n, be kwlá kanman!

Sran nga b’a wu’n, be kwlá siman be nuan. Ɔ maan be awlobofuɛ mun nin be janvuɛ’m b’a wun awlabɔɛ wie pɛ. Nán kɛ kusu e le wunmiɛn naan y’a kwla cɛn be ɔ. Sanngɛ Zoova kwla cɛn be. E ɲrun lɔ’n, é wá wún wafa nga Zoova wá cɛ́n sran kpanngban kpa mun’n.