BUSHE nga walifwile, e lyo wabuuka, banoko kuti baumfwa shani? Kuti batemwa sana! Lelo bushe umuntu nga afwa, kuti aba no mweo na kabili? Bushe ici calicitikapo?

Mona umwaume no mwanakashi no mwaice abali pa cikope. Uyu umwaume ni kasesema Eliya. Uyu umwanakashi ni mukamfwilwa uwaleikala ku Sarefati, kabili umwaice, mwana wakwe umwaume. Bushiku bumo umwana wakwe alilwele. Alilwalishe ica kuti asukile afwa. Lyena Eliya aebele umwanakashi ati: ‘Leta umwana obe kuno.’

Eliya asendele umwana uwafwile no kumutwala mu muputule wa pa mulu. Lyena apepele ati: ‘Mwe Yehova, lekeni uyu mwana abe no mweo na kabili.’ Awe umwaice atendeke ukupema! Lyena Eliya amutwele kuli nyina ninshi ali mu muputule wa pa nshi, e lyo amweba ati: ‘Mona umwana obe ali uwa mweo!’ E calengele banyina ukutemwa sana.

Kasesema wa kwa Yehova umbi uwali uwacindama, ni Elisha. Aleafwako Eliya imilimo. Lelo mu kuya kwa nshita, Yehova atendeke ukubomfya na Elisha wine ku kucita ifipesha amano. Bushiku bumo Elisha aile ku musumba wa Shunemu, uko asangile umwanakashi uwali no mutima uusuma. Ilyo papitile inshita, uyu mwanakashi alikwete umwana umwaume.

Ilyo ulya mwana akulile, bushiku bumo aile mu kwafwa bawishi abalebomba mwi bala. Apo pene umwana apundile ati: ‘Iye nafwa umutwe!’ Ilyo bamutwele fye ku ng’anda, alifwile. Banyina bali no bulanda sana! Apo pene fye banyina baileita Elisha.

Ilyo Elisha afikile, asendele umwana uwafwile no kuya mu muputule. Apepele kuli Yehova no kulaala pa mwana uwafwile. Awe umubili wa mwana watendeke ukukaba, kabili atesemwine imiku 7. Ilyo banyina baingile mu muputule, ala balitemenwe ukumona umwana wabo ali uwa mweo!

Bengi sana abantu abafwa. Ici calilenga balupwa wabo ne fibusa ukuba no bulanda sana. Tatwakwata amaka ya kubuusha abafwa, kano fye Yehova. Ku ntanshi, tukasambilila ifyo akabuusha abantu abafwa abengi sana.