NYI yena wafwa, kuchi noko mevwa nyi wahinduka cheka ni mwono? Iye mevwa chiseke chinji! Mutu yoze hafwa kulu shina mahasa kuhinduka cheka? Shina hi chinalingiwa kama limwe tangwa?

Tala lunga ni pwo au hamwe ni umwe kanuke. Lunga au kali profeta Eliya. Alioze pwo au kali umwe tuliwa wa mu mbonge ya Zarafata, kanuke au kali mwanenyi. Limwe tangwa kanuke au yayiza. Yikola yiyoka chinji hi kanuke wacho yafwa. Eliya yamba kuli pwo wacho ngwenyi: ‘Ngwehe kanuke au.’

Eliya yatwala kanuke wa kufwa ku chipatulo cha kwilu, yamupombesa ha muhela. Iye yalemba ngwenyi: ‘Yehova hindwisa kama kanuke yono.’ Hohene mwana yaputuka kuhwima! Eliya yamutwala mwishi lia zuwo kuli naye yamulweza ngwenyi: ‘Tala mwanee hapwa ni mwono!’ Kashika unamono ha chizulie naye ali ni chiseke chinji.

Umwe profeta mukwo mulemu wa Yehova jina lienyi te Elisha. Iye kanakapwa chikwashi wa Eliya. Nawa kulutwe lia matangwa Yehova yatuma Elisha hanga alinge yikomokeso. Limwe tangwa Elisha yaya ku mbonge ya Shuneme, kuzekwene yawanako umwe pwo yoze unakasolola umbovu wenyi hali iye. Kulutwe lia matangwa pwo wacho yasema umwe mwana wa lunga.

Muze te mwana wacho hakola, ha chimwe chimene iye yaya ni kutala tato te unakalakala mu munda. Susumuku mwana yaputuka kuteta ngwenyi: ‘Mama mutwe wami!’ Muze hamutwala ku zuwo, kanuke wacho yafwa. Naye kanakevwa chinyengo chinji. Chocho iye yaya ni kusaka Elisha.

Muze Elisha ahetele, iye yanyina ni kanuke wa kufwa ku chipatulo. Yalemba kuli Yehova, nawa yashachila helu lia mwana. Mujimba wa mwana yiusasaminya nawa yachehula yisuho shimbiali. Naye kanakevwa chiseke chinji ha kumona mwanenyi ha hinduka mu ufwe!

Atu anji hanafu. Yino yakuneha yinyengo yinji kuli asoko ni masepa jo. Yetwe tushi ni ndundo ja kuhindwisa afu. Alioze Yehova kali najo. Kulutwe mba mutukalilongesa chize iye makahindwisa tununu twa atu mu ufwe.