NAN THIH hnu ah hei nung ṭhan u law nan nu cu zeitin a um lai tiah dah nan ruah? Aa lawm ngaingai lai! Sihmanhsehlaw a thi cang mi pakhat cu a nung ṭhan kho hnga maw? Hlan ah cubantuk cu a rak um bal cang maw?

Hi hmanthlak i mipa, minu le ngakchiapate hi zoh hna hmanh u. Mipa cu profet Elijah a si. Minu cu Zarephath khua i nuhmeinu a si i, ngakchiapate cu a fapa a si. Nikhat cu ngakchiapate cu a zaw. A zual chin lengmang i a hnu ah a thi. Cutikah Elijah nih minu cu: ‘Ngakchiapate cu ka pe tuah,’ tiah a ti.

Elijah nih a thi mi ngakchiapate cu a lak i cungdot ah a kaipi i ih khun cung ah a ihter. Cun hitin thla a cam: ‘Maw Jehovah, ngakchiapate cu nunter ṭhan ko.’ Cun ngakchiapa cu a thaw a hun chuah! Cutikah Elijah nih a lak i tangdot ah a ṭumpi ṭhan i minu sin ahcun: ‘Zoh hmanh, na fapa cu a nung ṭhan!’ a ti. Cucaah a nu cu aa lawm ngaingai.

Cun a biapi ngai mi Jehovah a profet pakhat cu Elisha a si. Amah cu Elijah a bawmtu a si. Sihmanhsehlaw a caan a zat tik ah Jehovah nih Elisha zong cu khuaruahharnak tuah awk ah a hman ve. Nikhat cu Elisha cu Shunam khua ah a kal i, amah ṭha tein a rak zohkhenhtu minu pakhat he an i tong. A hnu ah hi minu cu fapa pakhat a ngei ve.

Zing khat cu, ngakchiapate a ṭhan deuh hnu ah, lo chung i rian a ṭuan mi a pa sin ah a va kal. Chikkhatte ah ngakchiapa cu: ‘Ka lu a fak tuk!’ tiah a au. Inn ah an tlunpi hnu ah ngakchiapate cu a thi ve. A nu cu a ngaih a chia ngaingai! Rianrang in a kal i Elisha kha a va kawh.

Elisha a rat tik ah, ngakchiapate a thihnak khaan chung ah a lut. Jehovah sin ah thla a cam i ngakchiapa pum cung ahcun a bawk. Tlawmpal ah ngakchiapate pum cu a hung lum i, voi sarih a hung hathiao. Ngakchiapa a nu cu a khaan chung ah a lut i a fapa a nun ṭhan mi a hmuh tik ah a lung aa lawm tuk ve!

Minung tampi cu an thi cang. Cucaah an hawikom le an chungkhar mi vialte an ngaih a chia ngai. Mithi thawhter ṭhan khawh nak ṭhawnnak cu kan ngei lo. Sihmanhsehlaw Jehovah nihcun a ngeih. A hnu ah minung nuai tampi cu zeitindah a nunter ṭhan hna lai ti kan cawn te lai.