BE BURGWIS gannar durgualile, ¿igi be nan iddoder be binsae? ¡Be nan yeeriddodele! Auggine, ¿dule burgwisale gannar nabir durgusbalile? ¿Iduar weyob ibmar gudii?

Sobar naidgi be dagge, massered gunaid, ome massi bibbibo gunanaid be dagbali. We masseredi Elías, Babdummad gaya berbegedi. Omedi Sarepta neggwebur ginedi, ei sui burgwisa, geb massigwadi we ome mimmi. Daggargu, ibagwengi we massigwa ueleali. Bur bule barbulosa, geb burgwenoniggi. Degiidgi Elías we omeg soge: ‘Massigwa be anga udage’.

Elías massigwa burgwisad sesa agla niba geb camayag mesidabbi. Degiidgi Babse goddesunna: ‘Jehová, gannar massigwa be wis oduloge’. ¡Geb massigwa bunnoali! Degiidgi Elías gannar odesa, geb omeg soge: ‘¡Dagge, be massi dula!’. Geb ome yeeriddonade.

Eliseo, Jehová gaya berbegedi, nug nigga gudigusmoga. We dina, Elías bendaggedgi arbae. Auggine, beedsegi Jehová anba imasmoga Eliseo, ibmar dagledisurmalad nabir imagmogadi. Ibagwengi Eliseo Sunem neggweburse nade, geb ome wargwen nued Eliseo aggwisa. Sorbali, we ome massi wargwen niggunoniggi.

Ibagwengi, we massi bad birga yagbasaar niggadgi, sabburba e bab arbanaidse nade. Geb uggiar binnasur gollali: ‘¡An nono nunmagge!’. Negse sesmargu, burgwenoniggi. ¡Ibiyob e nan nue wileiddoge! Yog nade binne Eliseo sunaega.

Eliseo nonigua, cuarto massigwa burgwarmaidse dogdabbi. Geb Jehovás godsa, geb burgwaled birgi megisa. Degiidgi nabbis massi e sana uue gude, geb ilagugle ismisa. ¡Ibiyob e nan yeeriddo nade dognonigua geb daggargua gannar e massi durgusa!

Buggidar dulemar burgwismalad. E gwenadgan nunmagged dummad sorbali iddodii gusdamala geb e aimala deyobmoga. Anmardi geg burgwarmalad oduloge. Auggine Jehovádi nabir imagge. Sorbali anmar daggoe igi Jehová, millónba mergu gannar dulemar gudigumaladga imaggoe.