I KA miiri k’a filɛ n’i sara, ani o y’i lakunu ka bɔ saya la, o bena mun lo kɛ i bamuso la? A bena ninsɔndiya dɛ! Nka, ni mɔgɔ sara, a tigi be se ka kunu wa? Yala o ɲɔgɔn delila ka kɛ wa?

Cɛɛ min be jaa nin kan, kira Eli lo. Muso min y’a bolow meleke a deen na o ye Sarefati (Sarɛpita) dugu firiyamuso dɔ ye. Ayiwa, loon dɔ a deen banana. A ka bana juguyara fɔɔ a sara. Eli y’a fɔ muso ye ko: ‘I dencɛ nin di ne ma.’

Eli yɛlɛla ni deen nin ye sanbon kɔnɔ k’a la dalan kan. O kɔ, a ye delili kɛ ko: ‘Jehova ne ka Ala, sabari ka sɔn deen nin ka kunu.’ Deen kununa! Eli ye deen nin ta ka jigi duguma boon kɔnɔ ani k’a fɔ a bamuso ye ko: ‘I deen filɛ a be niin na!’ O la, deen baa ninsɔndiyara kosɔbɛ!

Jehova ka kiraba dɔ wɛrɛ tɔgɔ ko Elize. Ale tun ye Eli dɛmɛbaga ye. Jehova tɛmɛna Elize fana fɛ ka kabako dɔw kɛ. Loon dɔ, Elize tagara Sunamu dugu kɔnɔ, yɔrɔ min na muso dɔ be to ka ɲumanya kɛ a ye. Kɔfɛ, o muso nana dencɛ dɔ wolo.

Deen nin tora ka bonya ani loon dɔ sɔgɔma a tagara a facɛ kɔ foro kɔnɔ. A barila ka kule ko: “Ne kuun be dimi!” U tagara n’a ye soo, ani a sara. O y’a bamuso dusu kasi dɛ! Muso sinna ka taga Elize nɔfɛ.

Elize nana tuma min na, deen suu tun lanin be boon min kɔnɔ, a donna yen. A ye Jehova deli, ani a lara deen nin suu kan. Dɔɔni deen nin farisogo gwanna tugun, ani a tisora siɲɛ wolonfila. Tuma min na muso donna k’a deen ye niin na, a ninsɔndiyara dɛ!

Mɔgɔ caamanba sara ka tɛmɛ. U somɔgɔw n’u teriw dusu kasira kosɔbɛ. See t’an ye ka suuw kunu, nka Jehova kɔni be se k’o kɛ. Kɔfɛ, an bena a ye cogo min na a bena mɔgɔ miliyɔn caaman lakunu ka bɔ saya la.