KƐJI ogbo ni atee bo shi kɛba wala mli ekoŋŋ lɛ, te onyɛ baanu he eha tɛŋŋ? Ebaaná miishɛɛ waa! Shi ani mɔ ko ni egbo lɛ hiɛ baanyɛ akã ekoŋŋ? Ani eko eba pɛŋ?

Kwɛmɔ nuu ni yɔɔ biɛ lɛ, kɛ yoo lɛ kɛ gbekɛ nuu fioo lɛ hu. Nuu lɛ ji gbalɔ Elia. Yoo lɛ ji yoo okulafo ni jɛ Zarefat maŋ lɛ mli, ni ebinuu ji gbekɛ lɛ. Ojogbaŋŋ, gbi ko lɛ hela mɔ gbekɛ lɛ. Hela lɛ mli bawa aahu kɛyashi egbo yɛ sɛɛ mli kwraa. Ni Elia kɛɛ yoo lɛ akɛ: ‘Okɛ gbekɛ lɛ aha mi.’

Elia wo gbekɛ ni egbo lɛ kɛtee ŋwɛitsu ko nɔ ni ekɛ lɛ yafɔ̃ saatso nɔ. Kɛkɛ ni esɔle akɛ: ‘Oo Yehowa, ha gbekɛ lɛ hiɛ atsɛ̃ ekoŋŋ.’ Ni gbekɛ lɛ bɔi muu! No sɛɛ lɛ Elia kɛ gbekɛ lɛ kpeleke shi ni ebakɛɛ yoo lɛ akɛ: ‘Kwɛmɔ, obi lɛ hiɛ kã ekoŋŋ!’ Enɛ hewɔ ni enyɛ mii eshɛ ehe waa nakai lɛ.

Yehowa gbalɔ kroko ni he hiaa waa hu ji Elisha. Esɔmɔ akɛ Elia yelikɛbualɔ. Shi yɛ be ko mli lɛ, Yehowa kɛ Elisha hu tsu nii ni ekɛfee naakpɛɛ nii. Gbi ko lɛ Elisha tee Shunem maŋ lɛ mli, ni yoo ko jie mlihilɛ kpo etsɔɔ lɛ. Yɛ sɛɛ mli lɛ yoo nɛɛ fɔ binuu.

Gbi ko leebi, beni gbekɛ lɛ hiɛ efã fioo lɛ, etee koni eyafata etsɛ ni tsuɔ nii yɛ eŋmɔ mli lɛ he. Amrɔ nɔŋŋ kɛkɛ ni gbekɛ lɛ bo akɛ: ‘Miyitso miigba mi!’ Beni akɛ lɛ ba shia lɛ, gbekɛ lɛ bagbo. Kwɛ bɔ ni enyɛ ye awerɛho ha! Amrɔ nɔŋŋ kɛkɛ ni eyatao Elisha.

Beni Elisha ba lɛ, ekɛ gbekɛ ni egbo lɛ tee tsũ lɛ mli. Esɔle eha Yehowa, ni ebú gbonyo lɛ nɔ. Etsɛɛɛ kɛkɛ ni gbekɛ lɛ he bɔi dɔɔ, ni etsine shii kpawo. Kwɛ bɔ ni enyɛ ná miishɛɛ waa eha beni ebana akɛ ebi lɛ hiɛ kã lɛ!

Mɛi babaoo diɛŋtsɛ egboi. Enɛ eha amɛwekui kɛ amɛnanemɛi anii efee mɔbɔ waa. Wɔbɛ hewalɛ ni wɔkɛaatee gbohii ashi. Shi Yehowa yɛ nakai hewalɛ lɛ. Yɛ sɛɛ mli lɛ wɔbaakase bɔ ni ebaafee ni ekɛ mɛi akpekpei abɔ ni egboi lɛ aba wala mli lɛ he sane.