OUKTULE pia, ¿jameerü saaʼin püi püsoʼiraale aaʼin? ¡Talateerü maʼin shia! ¿Eesü süpüla süsoʼiraain naaʼin na ouktushiikana? ¿Alatüsü tia sümaiwa?

Piirakaa nümüin chi wayuukai, tü jietkat jee chi jintüikai suluʼuka tü ayaakuaakat. Chi wayuukai nia Elías, chi nünüikimaajachikai Maleiwa. Tü jietkat chejeʼewalü Sarepta, süchon chi jintüikai. Soʼu wanee kaʼi ayuuishi chi jintüikai, mapa ouktaka nia. Nümaka Elías: ‹Pücheʼera tamüin chi jintüikai›.

Niisaleʼeraka Elías chi ouktushikai, nümaka: ‹Jeʼwaa, püsoʼireʼera naaʼin chi jintüikai›. ¡Nüsanalaaka chi jintüikai! Nümaka Elías sümüin tü niikat: ‹¡Katüsü noʼu chi püchonkai!› Talataka maʼin shia.

Wanee nünüikimaajachi Maleiwa nia Eliseo. Akaaliinjünüshi Elías nutuma. Mapa naainjaka Eliseo kasa pülasü nutuma Maleiwa. Soʼu wanee kaʼi nuʼunaka suluʼumüin tü mmakat Sunem. Eeka wanee wayuu kamaneesü maʼin nümüin. Kachonsü shia.

Miyoʼupa chi süchonkai nuʼunaka sünain aʼyatawaa nümaa chi nüshikai. Nuʼwaataka. ‹¡Aisü tekii!› Nüntinnapa nipialuʼumüin ouktaka nia. ¡Mojuka saaʼin tü niikat! Süsaajaka Eliseo.

Nüntapa Eliseo nikerotaka eemüin chi ouktushikai. Naashajaaka nümaa Jeʼwaa otta nujuleraaka naaʼu chi ouktushikai. Jaʼipa chi jintüikai nüshoujaka akaratshitua. ¡Talatüsü maʼin tü niikat shiʼrapa katüin noʼu!

Wainmairü wayuu ouktusü. Mojusü naaʼin napüshi otta naʼaleewain nachiirua. Nnojotsü süpüla wasoʼireʼerüin naaʼin na ouktushiikana, chi aainjakai tia nia Jeʼwaa. Wekirajaajeerü anain mapeena nüsoʼireʼerüinjatüin saaʼin wainma wayuu.