OTẸRỌNỌ who whu, ẹvẹ oni ra o re ru, re a te zihe owhẹ ze uzuazọ? Ọ rẹ ghọghọ gaga! Rekọ ohwo nọ owhu no ọ rẹ ghinẹ wariẹ zọ? Utioye ovia no ẹdẹjọ?

Rri ọzae nọ ọ rọ etenẹ na, gbe aye na jegbe ọmọzae ọsese na. Ọzae na yọ Elaeja ọruẹaro na. Aye na yọ aye-uku okpẹwho ologbo ọ Zarefat, yọ ọmọzae na ọmọ riẹ. Whaọ, ẹdẹjọ ọmọzae na o te kie ẹyao. O te muhọ eyeyoma bẹ se nọ ọ te rọ jọ ukuhọ riẹ whu. Kẹsiẹe Elaeja ọ ta kẹ aye na: ‘Rehọ ọmọzae na kẹ omẹ.’

Elaeja ọ tẹ rehọ ọmọ owhowhu na kpohọ ubrouwou obọ ehru ọ tẹ rehiẹe kiẹzẹ ehru ehwa. Kẹsiẹe ọ lẹ: ‘O Jihova, ru ọmọ na wariẹ zọ.’ Ọmọ na o te muhọ ẹwẹ! Kẹsena Elaeja ọ tẹ wọe zihe ze ubrouwou obọ otọ ọ tẹ ta kẹ aye na nọ: ‘Rri ọmọzae ra ọzọno!’ Onana osoriẹ nọ oni na ọ jẹ be ghọghọ gaga na.

Ọruẹaro ologbo Jihova ọfa jọ odẹ riẹ họ Elaesha. Ọ ye ọjọ ofiobọhọ kẹ Elaeja. Rekọ eva oke jọ Jihova ọ tẹ jẹ rehọ Elaesha ru eware igbunu re. Ẹdẹjọ Elaesha o te kpobọ okpẹwho ologbo Shunẹm obo nọ aye jọ ọ jọ riẹe ru gaga. Oke ofa aye ọnana o te wo ọmọzae ọboba.

Ohiohiẹ jọ, nọ ọmọ na ọze kpako no, ọ tẹ nya bru ọsẹ riẹ nọ ọrọ obọ udhu ru iruo. Idudhe na ọmọzae na o te bo: ‘Uzou u bi dhe omẹ!’ Nọ a rehiẹe kpobọ uwou no, ọmọzae na o te whu. Ẹvẹ oni riẹ oweri te! Ọ tẹ nwane nya i se Elaesha.

Okenọ Elaesha ọ nyaze, ọ tẹ wọ ọmọ owhowhu na kpobọ ukpẹ. Ọ tẹ lẹ se Jihova, o te kiẹzẹ ehru ori na. Ukri hi oma ọmọzae na u te muhọ ẹroro, ọ tẹ zehe azehe isiahrẹ. Who rri epanọ oni riẹ ọghọghọ te nọ ọ ro eva ruẹ ọmọzae riẹ ọkpokpọ!

Ahwo buobu, buobu awhu no. Onana u te ru iviuwou gbe egbẹnyusu rai weri gaga. Ma wo ogaga nọ a rẹ rehọ kpare iwhowhu hu. Rekọ Jihova o wo rie. Oke ofa ma re ti wuhrẹ kpahe epanọ ọ te rehọ zihe ima ahwo buobu ze uzuazọ.